ईडीची दादरमधील भरतक्षेत्रवर धाड

 

मुंबई, : ईडीचे धाड टाकण्याचे सत्र सध्या सुरूच आहे. याआधी काही प्रसिद्ध ज्वेलर्स दुकानावर धाड टाकल्या होत्या. ऐन लग्न सराईच्या धूमधडाक्यात ईडीने दादरमधील प्रसिद्ध भरतक्षेत्र या प्रसिद्ध शोरूमवर छापा टाकला आहे.

ईडीने बुधवारी एकाच वेळी ५ ठिकाणी धाड टाकली आहे. ईडीच्या या कारवाईमुळे एकच खळबळ उडाली आहे. भरतक्षेत्र साडीच्या दुकानाआड चुकीचे आर्थिक व्यवहार होत असल्याची प्राथमिक माहिती समोर आली आहे. सकाळी साडेदहाच्या सुमारास आलेले ईडीचे अधिकारी दुकानात झाडाझडती घेत असल्याची माहिती आहे.

भरतक्षेत्र हे प्रामुख्याने महागड्या साड्यांसाठी प्रसिद्ध आहे. लग्नसमारंभ आणि मोठमोठ्या सोहळ्यांसाठी लागणाऱ्या आकर्षक व महागड्या साड्या इथं विकल्या जातात. लगीनसराईच्या दिवसात या दुकानात पाय ठेवायलाही जागा नसते.

सध्या लगीनसराईचा मोसम सुरू असतानाच भरतक्षेत्रवर छापा पडला आहे. मागील चार ते पाच दिवसांपासून भरतक्षेत्रच्या चालकांची चौकशी सुरू होती. आज शोरूममध्ये जाऊन अधिकाऱ्यांनी चौकशी केली. काही महत्त्वाची कागदपत्रंही ईडीच्या अधिकाऱ्यांनी ताब्यात घेतल्याचे म्हटले जात आहे.