मुंबई : मुंबईतील कुर्ला येथे सोमवारी रात्री एक भीषण रस्ता अपघात झाला, ज्यात तीन जणांना आपला जीव गमवावा लागला तर १७ जण जखमी झाले. बृहन्मुंबई इलेक्ट्रिक सप्लाय अँड ट्रान्सपोर्ट (बेस्ट) च्या बसचे ब्रेक फेल झाल्याने हा अपघात झाल्याची माहिती महापालिकेच्या एका अधिकाऱ्याने दिली.
बीएमसीच्या अधिकाऱ्याने सांगितले की, हा अपघात कुर्ल्यातील बीएसएम एल येथील प्रभागाजवळ झाला. बेस्टची बस कुर्ला रेल्वे स्थानकातून अंधेरीला जात होती. मात्र बस अचानक चालकाच्या नियंत्रणाबाहेर गेली. बसने प्रथम पादचाऱ्यांना चिरडले आणि नंतर तेथे उभ्या असलेल्या काही वाहनांना धडक दिली. यानंतर एका रहिवासी सोसायटीच्या गेटला धडकून बस थांबली.
घटनेनंतर स्थानिक लोकांनी तातडीने मदत करण्यास सुरुवात केली आणि जखमींना जवळच्या भाभा रुग्णालयात दाखल केले. या अपघातात तिघांचा जागीच मृत्यू झाला. तर काही जखमींची प्रकृती चिंताजनक असल्याचे सांगण्यात येत आहे. अधिकाऱ्याच्या म्हणण्यानुसार, बसचे ब्रेक फेल झाल्याने अपघात झाला असावा असा संशय आहे.
याप्रकरणी पोलिसांनी बसचालकाला अटक केली आहे. मुंबई अग्निशमन विभागाने दिलेल्या माहितीनुसार रात्री ९.५० वाजता हा बस अपघात झाला. कुर्ल्याच्या भाभा रुग्णालयाचे वैद्यकीय अधिकारी डॉ अब्दुल यांनी सांगितले की, १० जखमींना रुग्णालयात आणण्यात आले.
