.jpeg)
हिरक मोहत्सवी पुरुष-महिला राज्य अजिंक्यपद व निवड चाचणी खो-खो स्पर्धा २०२५
शेवगाव : हिरकमहोत्सवी पुरुष व महिला राज्य अजिंक्यपद व निवड चाचणी खो-खो स्पर्धेत दुसऱ्या दिवशी सकाळच्या सत्रात साखळी सामन्यात पुरुष गटात धाराशिव, सोलापूर, सांगली यांनी तर महिला गटात धाराशिव, मुंबई उपनगर व रत्नागिरी यांनी विजय मिळवत गटात अव्वल स्थान मिळवले आहे.
महाराष्ट्र खो-खो असोसिएशन, अहमदनगर खो-खो असोसिएशनच्या मान्यतेने व शेवगाव स्पोर्ट्स बहुउद्देशीय फाउंडेशन, सत्यभामा प्रतिष्ठान, मराठा विद्या प्रसारक समाजाचे न्यू आर्टस्, कॉमर्स आणि सायन्स कॉलेज यांच्या संयुक्त विद्यमाने अहिल्यानगर शेवगाव येथे होत असलेल्या हिरकमहोत्सवी पुरुष व महिला राज्य अजिंक्यपद व निवड चाचणी खो-खो स्पर्धा खंडोबा क्रिडांगणावर सुरु आहे.
आज सकाळच्या सत्रात महिला गटात धाराशिव संघाने छ. संभाजीनगरचा १ डाव १७ गुणांनी (२२-५) पराभव केला. विजयी संघातर्फे मिताली पवार, संध्या सुरवसे यांनी चांगला खेळ केला. दुसऱ्या सामन्यात रत्नागिरीने जालन्याचा १२-९ एक डाव ३ गुणांनी पराभव केला. विजयी संघातर्फे रिद्धी चव्हाण, अपेक्षा सुतार, पायल पवार यांनी चांगला खेळ केला. तर जालनातर्फे वैष्णवी मदन, वैशाली वाघ यांनी चांगला खेळ.
तिसऱ्या सामन्यात फ गटात मुंबई संघाने सातारा संघाचा एक गुणाने (१०-९) पराभव केला. विजय संघातर्फे सेजल यादव, सिया नाईक, रिद्धी कबीर यांनी चांगला खेळ केला. तर सातारा संघातर्फे भाग्यश्री फाले, सलोनी भोसले यांनी चांगला खेळ केला. पुरुष गटात धाराशिवने धुळ्याचा एक डाव ८ गुणांनी (१७-९) सहज पराभव केला. धाराशिवतर्फे हार्द्या वसावे, विजय शिंदे, सचिन पवार, भगतसिंग वसावे यांनी तर धुळेकडून विकी धनगर यांनी चांगला खेळ केला.
दुसऱ्या सामन्यात सोलापूरने नंदुरबार चा एक डाव एक गुणाने (१२-११) पराभूत केले. सोलापूर कडून अजय कश्यप, जुबेर शेख यांनी चांगला खेळ केला. तर नंदुरबार तर्फे कैलास पटेल यांनी चांगला खेळ केला. तिसऱ्या सामन्यात सांगलीने साताऱ्याचा (१६-१२) पराभव केला. त्यात सागर गायकवाड, राजू हक्के यांनी तर साताऱ्यातर्फे ओंकार मासले यांनी चांगला खेळ केला.
यजमान अहिल्यानगरने नाशिकचा विजय मिळवला. अहिल्यानगरतर्फे रामेश्वर नरेंद्र, शिवाजी सारंग यांनी तर नाशिकतर्फे ओम कांगणे यांनी चांगला खेळ केला.साखळी सामन्यात पुरुष गटात पुणे, मुंबई उपनगर, ठाणे, सांगली, सोलापूर, धाराशिव, मुंबई यांनी तर महिला गटात ठाणे, पुणे, धाराशिव, रत्नागिरी, मुबंई यांनी उपउपांत्यपूर्व फेरीत प्रवेश केला आहे.
