.jpeg)
नवी मुंबई : बेस्टपाठोपाठ आता नवी मुंबई महापालिका परिवहन उपक्रमाने देखील एनएमएमटी बसमधून प्रवास करताना मोबाईल फोनवर मोठ्या आवाजात बोलण्यास किंवा मोठया आवाजात गाणी, व्हिडीओ वाजवण्यास मनाई करण्यात आली आहे. आपल्या शेजारच्या सहप्रवाशांची गैरसोय टाळण्यासाठी हा निर्णय घेण्यात आल्याचे एनएमएमटी प्रशासनाने स्पष्ट केले आहे. याबाबतचे आदेश नवी मुंबई महापालिका परिवहन उपक्रमाचे व्यवस्थापक योगेश कडुसकर यांनी नुकतेच जारी केले आहेत.
सार्वजनिक उपक्रमांच्या बसेसमधून प्रवास करताना अनेकजण मोबाईल फोनवर मोठमोठयाने बोलतात किंवा मोठ्या आवाजात गाणी, व्हिडीओ वाजवतात. यामुळे सार्वजनिक उपक्रमांच्या बसेसमधून प्रवास करणाऱ्या इतर प्रवाशांना त्याचा त्रास होत असल्याचे आढळून आले आहे. त्यामुळे प्रवाशांमध्ये वाद विवादाचे प्रकार होऊ लागल्याने नवी मुंबई महापालिका परिवहन उपक्रमाने देखील आपल्या बसेसमधून प्रवास करणाऱ्या प्रवाशांना मोबाईल फोनवर मोठ्या आवाजात बोलण्यास किंवा मोठ्या आवाजात गाणी, व्हिडीओ वाजवण्यास मनाई केली आहे.
नवी मुंबई महापालिकेच्या परिवहन उपक्रमाची (एनएमएमटी) सेवा ही सार्वजनिक परिवहन सेवा असल्याचे व बसमधून प्रवास करणाऱ्या प्रवाशांना कोणत्याही प्रकारचा त्रास अन्य प्रवाशांकडून होऊ नये, याकरीता मुंबई पोलीस कायद्याअंतर्गत सदर प्रवाशांवर कारवाई केली जाईल असे या आदेशात म्हटले आहे.
