जिल्हाधिकाऱ्यांच्या अधिकाऱ्यांना सूचना
जळगाव : गणेशोत्सव २०२५ च्या पार्श्वभूमीवर जळगावात उत्सवाची तयारी वेगाने सुरू झाली आहे. जिल्हाधिकारी आयुष प्रसाद यांच्या अध्यक्षतेखाली आयोजित बैठकीत शहरातील सुरक्षाव्यवस्था, परवानग्या, विसर्जन नियोजन आणि वीजपुरवठा यासंबंधी सविस्तर आढावा घेण्यात आला.
या बैठकीला जळगाव महानगरपालिका आयुक्त ज्ञानेश्वर ढेरे, उपविभागीय पोलीस अधिकारी (जळगाव शहर) संदीप गावित, तसेच महावितरणचे अधीक्षक अभियंता विनोद पाटील उपस्थित होते. बैठकीत गणेशोत्सव सुरक्षित, स्वच्छ आणि सुसंस्कृत पद्धतीने पार पाडण्यासाठी खालील महत्त्वाचे मुद्दे चर्चेत आले.
1️⃣ गर्दी व सुरक्षा व्यवस्थापन – विसर्जन मिरवणुका व सार्वजनिक गणेश मंडपांभोवती पुरेशी पोलीस बंदोबस्ताची व्यवस्था.
2️⃣ परवानग्यांसाठी सिंगल विंडो सिस्टम – विविध विभागांकडून मिळणाऱ्या परवानग्यांसाठी एकाच ठिकाणी सुलभ प्रक्रिया.
3️⃣ विसर्जनाची वेळेत पूर्तता – गर्दी टाळण्यासाठी आणि वाहतूक सुरळीत ठेवण्यासाठी वेळेचे काटेकोर नियोजन.
4️⃣ प्रभागनिहाय विसर्जन नियोजन – प्रत्येक प्रभागानुसार विसर्जन स्थळे, वेळापत्रक आणि मार्ग निश्चित करणे.
5️⃣ कमी उंचीवरील वीजतारा दूर करणे व अर्थिंगची व्यवस्था – मिरवणुकीदरम्यान अपघात टाळण्यासाठी सुरक्षात्मक उपाय.
6️⃣ मेहरूण तलावात स्वच्छ पाण्याची उपलब्धता – पर्यावरणपूरक विसर्जनासाठी स्वच्छ पाण्याची व्यवस्था.
जिल्हाधिकाऱ्यांनी सर्व विभागांना परस्पर समन्वय ठेवून नियोजनाची अंमलबजावणी करण्याचे निर्देश दिले. नागरिकांनीही प्रशासनाला सहकार्य करून सुरक्षित व स्वच्छ गणेशोत्सव साजरा करण्याचे आवाहन करण्यात आले.
