त्रिची: तामिळनाडूहून शारजाहला जाणाऱ्या एअर इंडिया एक्स्प्रेसच्या फ्लाइटमध्ये तांत्रिक बिघाड झाल्याने त्याचे इमर्जन्सी लँडिंग करण्यात आले. त्रिची, तामिळनाडूहून शारजाला जाणाऱ्या एअर इंडिया एक्सप्रेसच्या विमानात तांत्रिक बिघाड झाल्यानंतर नागरी उड्डाण मंत्रालयाने डीजीसीएला या प्रकरणाची चौकशी करण्याचे आदेश दिले आहेत. विमानात १४१ प्रवासी होते. टेकऑफनंतर सुमारे दोन तास ४५ मिनिटांनी विमानाने त्रिची विमानतळावर सुरक्षित आपत्कालीन लँडिंग केले.
नागरी उड्डाण मंत्रालयाने एक निवेदन जारी करून एअर इंडिया एक्सप्रेस फ्लाइट क्रमांक IX613 च्या क्रू सदस्यांचे आणि त्रिची विमानतळावरील सर्व अधिकारी आणि कर्मचारी यांचे कौतुक केले, ज्यांच्या शहाणपणाने आणि कठोर परिश्रमाने विमान सुरक्षितपणे उतरण्यास मदत झाली. IX 613 ने शुक्रवारी संध्याकाळी ५.३२ वाजता त्रिची विमानतळावरून उड्डाण केले. टेकऑफनंतर काही वेळातच पायलटला लँडिंग गियरच्या हायड्रॉलिक सिस्टीममध्ये बिघाड आढळून आला. यानंतर इमर्जन्सी लँडिंगची परवानगी मागण्यात आली. विमानाने अडीच तासांहून अधिक काळ हवेत प्रदक्षिणा घातली आणि त्याचे इंधन संपले. यानंतर इमर्जन्सी लँडिंग करण्यात आले.
मंत्रालयाने सांगितले की, “संध्याकाळी ६.०५ वाजता पूर्ण आणीबाणी घोषित केल्यानंतर, विमानतळ आणि आपत्कालीन पथकांनी सुरळीत आणि प्रभावीपणे काम केले. लँडिंगच्या तयारीत विमानाच्या द्रुत समन्वयाचे आम्ही कौतुक करतो. रात्री ८.१५ वाजता विमान यशस्वीपणे उतरले. “नागरी विमान वाहतूक महासंचालनालयाला (DGCA) हायड्रॉलिक समस्येचे कारण शोधण्यासाठी विमानाची सखोल चौकशी करण्याचे निर्देश देण्यात आले आहेत,” असे निवेदनात म्हटले आहे. यावेळी विमानातील प्रवाशांचे तसेच विमानतळावर उपस्थित अधिकारी-कर्मचाऱ्यांचा श्वास रोखून धरला गेला. सर्वजण विमानाच्या सुरक्षित लँडिंगसाठी प्रार्थना करत राहिले. विमानतळावरील सर्व विमानांची हालचाल थांबवून आपत्कालीन लँडिंगची पूर्ण तयारी करण्यात आली होती. अग्निशमन दलाच्या १८ गाड्यांसह २० रुग्णवाहिकाही सज्ज ठेवण्यात आल्या होत्या.
