एकाचा मृत्यू, एक जखमी
दिवा \ आरती परब : रविवारी सायंकाळी सुमारे ५ वाजताच्या सुमारास सुदामा रेसिडेन्सी बाजूला, खर्डीगाव, दिवा शीळ रोड, दिवा (पूर्व), ठाणे येथे टोरंट पॉवर कंपनीच्या ओव्हरहेड वायरवर कबुतर अडकल्याची माहिती मिळताच दिवा बीट अग्निशमन केंद्राचे जवान बचाव कार्यासाठी घटनास्थळी दाखल झाले होते.
कबुतराची सुटका करत असताना दुर्दैवाने दोन अग्निशमन जवानांना ओव्हरहेड वायरमधून विजेचा धक्का बसला. तत्काळ दोघांना छत्रपती शिवाजी महाराज रुग्णालय, कळवा येथे दाखल करण्यात आले. मात्र उपचारादरम्यान उत्सव पाटील (वय २८, रा. आगासन गाव, दिवा) यांचा मृत्यू झाल्याचे रुग्णालयातील वैद्यकीय अधिकाऱ्यांनी घोषित केले. तर आझाद पाटील (२९, रा. वाडा, पालघर) यांना हात व छातीला भाजल्याने उपचार सुरू आहेत.
घटनेनंतर छत्रपती शिवाजी महाराज रुग्णालयात उपायुक्त दिनेश तायडे, मुख्य अग्निशमन अधिकारी झळके, अग्निशमन दलाचे अधिकारी व कर्मचारी तसेच आपत्ती व्यवस्थापन कक्षाचे कर्मचारी उपस्थित राहून परिस्थितीचा आढावा घेत आहेत. या दुर्दैवी घटनेमुळे दिवा परिसरात हळहळ व्यक्त केली जात आहे.