देशभरात १५,०००हून अधिक चार्जिंग पॉइंट्ससह नेटवर्क मजबूत
मुंबई : किया इंडियाने भारत पेट्रोलियम कॉर्पोरेशन लिमिटेड (बीपीसीएल) सोबत सामंजस्य करार (एमओयू) करत आपल्या सार्वजनिक ईव्ही चार्जिंग नेटवर्कचा मोठ्या प्रमाणावर विस्तार केला आहे. या भागीदारीमुळे किया इंडियाची ‘के-चार्ज’ परिसंस्था देशभरात १५,०००हून अधिक चार्जिंग टचपॉइंट्सपर्यंत पोहोचली असून, ईव्ही ग्राहकांसाठी चार्जिंग सुविधा अधिक सहज व विश्वासार्ह बनणार आहेत.
या सहकार्याबाबत किया इंडियाचे सेल्स आणि मार्केटिंगचे वरिष्ठ उपाध्यक्ष अतुल सूद यांनी सांगितले की, “ईव्ही स्वीकारासाठी सोयीसुविधा आणि विश्वास अत्यंत महत्त्वाचा आहे. बीपीसीएलसोबतच्या या भागीदारीमुळे आम्ही ईव्ही मालकीचा अनुभव अधिक सुलभ करत असून, ग्राहकांना देशभर प्रवासाचे नियोजन आत्मविश्वासाने करता येईल.”
ईव्ही स्वीकार वाढत असताना चार्जिंग पायाभूत सुविधांची उपलब्धता हा मोठा घटक ठरत आहे. के-चार्ज प्लॅटफॉर्ममध्ये बीपीसीएलच्या सार्वजनिक चार्जिंग नेटवर्कचा समावेश केल्याने शहरी भाग, महामार्ग तसेच आंतरशहरी मार्गांवर ईव्ही प्रवास अधिक सोपा होणार आहे.
किया इंडिया आणि बीपीसीएल यांच्यात हा करार गोव्यातील ओएनजीसी अकॅडमी ट्रेनिंग इन्स्टिट्यूट येथे २७ ते ३० जानेवारीदरम्यान आयोजित इंडिया एनर्जी वीक २०२६ दरम्यान करण्यात आला. या कराराअंतर्गत बीपीसीएलचे ३,०००हून अधिक चार्जिंग पॉइंट्स ‘के-चार्ज’ प्लॅटफॉर्मवर ऑनबोर्ड करण्यात येणार आहेत, ज्यामुळे राष्ट्रीय स्तरावरील नेटवर्क उपस्थिती अधिक बळकट होईल.
‘मायकिया’ अॅप आणि किया इंडिया वेबसाइटद्वारे उपलब्ध असलेला के-चार्ज प्लॅटफॉर्म ग्राहकांना चार्जिंग स्टेशन शोधणे, मार्गदर्शन मिळवणे आणि एकाच डिजिटल प्लॅटफॉर्मवरून पेमेंट करण्याची सुविधा देतो. यामुळे स्वतंत्र चार्जिंग प्रदात्यांवरील अवलंबन कमी होऊन ईव्ही मालकीचा अनुभव अधिक सुसंगत होणार आहे.
किया इंडियाच्या वाढत्या ईव्ही पोर्टफोलिओशी हे पायाभूत सुविधा विस्तार संलग्न आहेत. भारतात निर्मित कॅरेन्स क्लॅव्हिस ईव्हीला ७-सीटर कॉन्फिगरेशन आणि आधुनिक तंत्रज्ञानासाठी चांगला प्रतिसाद मिळत असून, ईव्ही६ आणि ईव्ही९ या जागतिक मॉडेल्समुळे कियाची भारतातील इलेक्ट्रिक मोबिलिटी उपस्थिती अधिक मजबूत झाली आहे.
चार्जिंग पायाभूत सुविधा आणि परिसंस्था भागीदारीत सातत्याने गुंतवणूक करत किया इंडिया इलेक्ट्रिक मोबिलिटी अधिक सुलभ, विश्वासार्ह आणि ग्राहकाभिमुख करण्यावर भर देत असून, देशातील ईव्ही क्रांतीच्या पुढील टप्प्याला चालना देत आहे.