सुटकेसाठी मुख्यमंत्री विजय यांची केंद्राकडे मागणी
चेन्नई : श्रीलंकेच्या नौदलाने आंतरराष्ट्रीय सागरी सीमा रेषेचे (IMBL) कथित उल्लंघन केल्याच्या आरोपावरून तामिळनाडूतील ११ भारतीय मच्छीमारांना गुरुवारी अटक केली. या पार्श्वभूमीवर तामिळनाडूचे मुख्यमंत्री सी. जोसेफ विजय यांनी केंद्रीय परराष्ट्र मंत्री एस. जयशंकर यांना पत्र लिहून मच्छीमार आणि त्यांची बोट यांची तातडीने सुटका करण्यासाठी हस्तक्षेप करण्याची मागणी केली आहे.
मुख्यमंत्र्यांनी पत्रात म्हटले आहे की, रामनाथपुरम जिल्ह्यातील ११ मच्छीमार यांत्रिक बोटीने मासेमारीसाठी गेले असताना यांत्रिक बिघाडामुळे त्यांची बोट नेदुंथीवू किनाऱ्याजवळ अडकली होती. त्यानंतर श्रीलंकेच्या नौदलाने आंतरराष्ट्रीय सागरी सीमा रेषा ओलांडल्याचा आरोप करत मच्छीमारांसह बोट ताब्यात घेतली.
श्रीलंकेच्या नौदलाकडून तामिळनाडूतील मच्छीमारांना वारंवार अटक केली जात असल्याने मासेमारी व्यवसायावर अवलंबून असलेल्या कुटुंबांमध्ये भीती आणि अनिश्चिततेचे वातावरण निर्माण होत असल्याचे विजय यांनी नमूद केले. त्यांनी केंद्र सरकारला विनंती केली की, योग्य राजनैतिक माध्यमातून श्रीलंका सरकारशी तातडीने चर्चा करून अटक करण्यात आलेल्या सर्व मच्छीमारांची सुरक्षित सुटका आणि त्यांची मासेमारीची बोट परत मिळवून द्यावी.
याशिवाय, भारत-श्रीलंका संयुक्त कार्यगट (Joint Working Group - JWG) पुन्हा सक्रिय करून द्विपक्षीय चर्चेला गती दिल्यास अशा घटना वारंवार घडण्यापासून रोखण्यास मदत होईल, असेही मुख्यमंत्री विजय यांनी आपल्या पत्रात म्हटले आहे. मच्छीमारांच्या उपजीविकेचे आणि हिताचे संरक्षण करण्यासाठी केंद्रीय परराष्ट्र मंत्र्यांनी वैयक्तिक लक्ष घालून तातडीने कारवाई करावी, अशी अपेक्षाही त्यांनी व्यक्त केली.