५० षटकांच्या क्रिकेटमध्ये १२ हजार धावा करणारा रोहित सातवा फलंदाज
गुवाहाटी | प्रतिनिधी
MAHARASHTRA WEBNEWS
वेस्ट इंडिजविरुद्धच्या दुसऱ्या एकदिवसीय सामन्यात भारताचा अनुभवी फलंदाज रोहित शर्माने बुधवारी विक्रमी कामगिरी केली. ४०६ धावांच्या मोठ्या लक्ष्याचा पाठलाग करताना रोहितने वनडे क्रिकेटमध्ये १२ हजार धावांचा टप्पा पूर्ण केला. अशी कामगिरी करणारा तो जगातील सातवा आणि भारताचा तिसरा फलंदाज ठरला.
रोहितने आपल्या २९१व्या वनडे सामन्यात हा विक्रम नोंदवला. त्याच सामन्यात त्याने अवघ्या ७२ चेंडूंत शतक झळकावत वनडे कारकिर्दीतील ३५वे शतक पूर्ण केले. त्याच्या शतकी खेळीत १० चौकार आणि ६ षटकारांचा समावेश होता.
बारसापारा क्रिकेट स्टेडियमवर रोहितचे हे तीन सामन्यांमधील दुसरे शतक ठरले. ३९ वर्षीय रोहित सध्या केवळ वनडे क्रिकेटमध्ये खेळत असून, पुढील वर्षीच्या वनडे विश्वचषकाच्या पार्श्वभूमीवर त्याचा अनुभव संघासाठी महत्त्वाचा मानला जात आहे. वनडेत त्याच्या नावावर ६२ अर्धशतके असून, त्याची फलंदाजीची सरासरी जवळपास ५० धावांची आहे.
सचिन आणि विराटच्या पंक्तीत
१२ हजार वनडे धावांचा टप्पा गाठल्यानंतर रोहित आता सचिन तेंडुलकर आणि विराट कोहली यांच्या पंक्तीत दाखल झाला आहे. सचिनच्या नावावर वनडेत सर्वाधिक १८,४२६ धावा असून, विराट कोहलीने मालिकेतील पहिल्या सामन्यात तिरुवनंतपुरम येथे १५ हजार धावांचा टप्पा गाठला होता.
वनडे क्रिकेटमध्ये सर्वाधिक धावा करणाऱ्या फलंदाजांच्या यादीत रोहित सध्या सातव्या स्थानावर आहे. सचिन तेंडुलकर आणि विराट कोहली अनुक्रमे पहिल्या दोन स्थानांवर आहेत.
या यादीत श्रीलंकेचा कुमार संगकारा १४,२३४ धावांसह तिसऱ्या, ऑस्ट्रेलियाचा रिकी पाँटिंग १३,७०४ धावांसह चौथ्या, श्रीलंकेचा सनथ जयसूर्या १३,४३० धावांसह पाचव्या आणि महेला जयवर्धने १२,६५० धावांसह सहाव्या स्थानावर आहे.
दरम्यान, भारताचा कर्णधार शुभमन गिलनेही वनडे कारकिर्दीतील ११वे शतक झळकावत संघाच्या डावाला बळकटी दिली.
