श्रीलंकेवर १४७ धावांनी दणदणीत विजय
निस्शिन : आशियाई क्रीडा स्पर्धा २०२६ मध्ये भारताने आपल्या सुवर्णपदकाचे खाते थाटात उघडले आहे. भारतीय महिला क्रिकेट संघाने अंतिम सामन्यात श्रीलंकेचा तब्बल १४७ धावांनी पराभव करत सुवर्णपदकावर सलग दुसऱ्यांदा आपले नाव कोरले. हरमनप्रीत कौरच्या नेतृत्वाखालील भारतीय संघाने फलंदाजी आणि गोलंदाजी अशा दोन्ही आघाड्यांवर दमदार कामगिरी करत श्रीलंकेला अक्षरशः निष्प्रभ केले. २०२३च्या हांगझोऊ आशियाई क्रीडा स्पर्धेतील अंतिम सामन्याची पुनरावृत्ती करत भारताने पुन्हा एकदा श्रीलंकेवर मात केली.
अंतिम सामन्यात भारताने नाणेफेक जिंकून प्रथम फलंदाजी करण्याचा निर्णय घेतला. सलामीवीर स्मृती मानधना आणि शेफाली वर्मा यांनी आक्रमक सुरुवात करून भारताच्या मोठ्या धावसंख्येचा पाया रचला. मानधनाने अवघ्या ४५ चेंडूंत ७९ धावांची तडाखेबाज खेळी केली. तिच्या खेळीत पाच चौकार आणि सात षटकारांचा समावेश होता. शेफाली वर्माने २९ चेंडूंत ४८ धावा करत मानधनाला उत्तम साथ दिली. दोघींनी मिळून पहिल्या गड्यासाठी ९९ धावांची भागीदारी केली.
यानंतर कर्णधार हरमनप्रीत कौरने १९ धावांचे योगदान दिले. अखेरच्या षटकांमध्ये रिचा घोषने आक्रमक फलंदाजी करत केवळ २२ चेंडूंत नाबाद ४९ धावा ठोकल्या. तिच्या खेळीत सहा चौकार आणि तीन षटकार होते. त्यामुळे भारताने निर्धारित २० षटकांत ३ बाद २१६ धावांचा डोंगर उभारला. ही आशियाई क्रीडा स्पर्धेतील महिला क्रिकेटच्या इतिहासातील सर्वोच्च धावसंख्या ठरली.
२१७ धावांचे मोठे आव्हान घेऊन मैदानात उतरलेल्या श्रीलंकेच्या फलंदाजांना भारतीय गोलंदाजांसमोर फारशी चमक दाखवता आली नाही. कर्णधार चमारी अटापट्टूने २१ चेंडूंत २९ धावा करत प्रतिकार करण्याचा प्रयत्न केला; मात्र अन्य फलंदाजांना मोठी खेळी करता आली नाही. भारतीय गोलंदाजांनी नियमित अंतराने बळी घेत श्रीलंकेचा डाव १५.४ षटकांत अवघ्या ६९ धावांवर गुंडाळला.
दीप्ती शर्माने भेदक गोलंदाजी करत चार षटकांत अवघ्या सहा धावा देत तीन बळी घेतले. शेफाली वर्मानेही गोलंदाजीत प्रभावी कामगिरी करत दोन बळी मिळवले. भारतीय गोलंदाजांच्या अचूक माऱ्यामुळे श्रीलंकेचा डाव सावरू शकला नाही आणि भारताने १४७ धावांनी दणदणीत विजय मिळवला.
या विजयासह भारताने आशियाई क्रीडा स्पर्धेतील महिला क्रिकेटचे सुवर्णपदक सलग दुसऱ्यांदा जिंकले आहे. २०२३मध्ये हांगझोऊ येथे श्रीलंकेला पराभूत करून भारताने सुवर्णपदक पटकावले होते. आता २०२६मध्येही अंतिम सामन्यात श्रीलंकेवर मात करत भारताने आपले विजेतेपद कायम राखले.
स्मृती मानधनाची तडाखेबाज फलंदाजी, शेफाली वर्माची अष्टपैलू कामगिरी, रिचा घोषचा अखेरच्या षटकांतील आक्रमक खेळ आणि दीप्ती शर्माच्या प्रभावी गोलंदाजीमुळे भारताचा विजय अधिक संस्मरणीय ठरला. आशियाई क्रीडा स्पर्धा २०२६मध्ये भारताला पहिले सुवर्णपदक मिळवून देणाऱ्या भारतीय महिला क्रिकेट संघाच्या या ऐतिहासिक कामगिरीचे सर्व स्तरांतून कौतुक होत आहे.
