ठाणे महापालिका क्षेत्रात २२ नोव्हेंबरला पल्स पोलिओ मोहीम

 


पाच वर्षांखालील बालकांना मिळणार डोस

ठाणे : बालकांचे पोलिओपासून संरक्षण करण्यासाठी ठाणे महानगरपालिकेच्या आरोग्य विभागाच्या वतीने रविवार, २२ नोव्हेंबर रोजी उपराष्ट्रीय पल्स पोलिओ लसीकरण मोहीम राबविण्यात येणार आहे. या मोहिमेत पाच वर्षांखालील सर्व बालकांना पोलिओची लस देण्यात येणार असून, एकही बालक लसीकरणापासून वंचित राहू नये, यासाठी महापालिकेने विशेष नियोजन केले आहे.

भारत पोलिओमुक्त झाला असला, तरी जगातील काही देशांमध्ये अद्याप पोलिओचे रुग्ण आढळून येत आहेत. त्यामुळे देशात या आजाराचा पुन्हा प्रादुर्भाव होऊ नये, यासाठी प्रत्येक पल्स पोलिओ मोहिमेत बालकांना लसीकरण करणे आवश्यक आहे. याच पार्श्वभूमीवर ठाणे महापालिका क्षेत्रातील विविध लसीकरण केंद्रांवर २२ नोव्हेंबर रोजी पोलिओचे डोस देण्यात येणार आहेत.

मोहिमेच्या पुढील टप्प्यात २३ ते २७ नोव्हेंबरदरम्यान महापालिकेच्या आरोग्य विभागाची पथके घरोघरी भेट देऊन लसीकरणापासून वंचित राहिलेल्या बालकांना पोलिओचा डोस देणार आहेत. त्यामुळे मोहिमेच्या दिवशी केंद्रावर न येऊ शकलेल्या बालकांनाही घरीच लसीकरणाची सुविधा उपलब्ध होणार आहे.

पालकांनी आपल्या पाच वर्षांखालील बालकांना जवळच्या लसीकरण केंद्रावर घेऊन जाऊन पोलिओचा डोस द्यावा, असे आवाहन महापौर शर्मिला पिंपळोलकर आणि महापालिका आयुक्त सौरभ राव यांनी केले आहे.

महापालिकेच्या सर्व आरोग्य केंद्रांमध्ये पोलिओची लस विनामूल्य उपलब्ध असून, पालकांनी या मोहिमेला उत्स्फूर्त प्रतिसाद द्यावा, असे आवाहन वैद्यकीय आरोग्य अधिकारी डॉ. प्रसाद पाटील यांनी केले आहे.

Post a Comment

Previous Post Next Post