.jpeg)
मुंबई: पिसे येथील न्यूमॅटिक गेट सिस्टिम मधील एअर ब्लॅडर बदलण्याच्या कामासाठी सोमवार दिनांक २० नोव्हेंबर ते शनिवार २ डिसेंबर २०२३ या कालावधीत मुंबईतील सर्व विभागात १० टक्के पाणीकपात करण्याचा निर्णय पालिकेने घेतला आहे.
बृहन्मुंबई महानगरपालिकेस पाणीपुरवठा करणाऱ्या पिसे येथील न्यूमॅटिक गेट सिस्टिममधील एअर ब्लॅडर बदलण्याचे काम सोमवार दिनांक २० नोव्हेंबर २०२३ ते शनिवार दिनांक २ डिसेंबर २०२३ पर्यंत हाती घेण्याचे ठरविण्यात आले आहे. सदर तातडीच्या दुरुस्ती कामामुळे मुंबईमधील व बृहन्मुंबई महानगरपालिकेतर्फे ठाणे व भिवंडी महानगरपालिकेस होणाऱ्या पाणीपुरवठ्यावर परिणाम होणार आहे. सबब, सोमवार दिनांक २० नोव्हेंबर २०२३ ते शनिवार दिनांक २ डिसेंबर २०२३ या कालावधीत मुंबई महानगरात तसेच बृहन्मुंबई महानगरपालिकेतर्फे ठाणे व भिवंडी महानगरपालिकेस होणाऱ्या पाणीपुरवठ्यात १० टक्के पाणी कपात करण्यात येणार आहे.
मुंबई महानगरातील सर्व विभागातील नागरिकांनी उपरोक्त नमूद कालावधीत पाणी कपातीपूर्वी अगोदरच्या दिवशी पाण्याचा आवश्यक साठा करुन ठेवावा. तसेच, कपातीच्या कालावधीत काटकसरीने पाणी वापरुन सहकार्य करावे, अशी विनंती बृहन्मुंबई महानगरपालिका प्रशासनाच्या वतीने करण्यात येत आहे.