ठाणे : शरदचंद्र पवार राष्ट्रवादी काँग्रेसचे नेते जितेंद्र आव्हाड यांच्या गाडीवर हल्ला करणाऱ्या दोन आरोपींना डोंगरी पोलिसांनी अटक केली आहे. श्रावण दुबे आणि प्रदीप फणसे अशी दोन्ही आरोपींची नावे आहेत. दोन्ही आरोपींना न्यायालयाने पाच दिवसांची पोलीस कोठडी सुनावली असल्याचे डोंगरी पोलिसांचे म्हणणे आहे.
राष्ट्रवादी काँग्रेसचे (एसपी) आमदार जितेंद्र आव्हाड यांच्या गाडीवर गुरुवारी २५ जुलै रोजी काही लोकांनी हल्ला केला होता. त्यांनी आमदारांच्या एसयूव्ही गाडीच्या मागच्या बाजूला लाठ्या मारल्या आणि दगडफेकही केली. यावेळी हल्लेखोरांनी संभाजी छत्रपतींच्या समर्थनार्थ घोषणाबाजी करून तेथून पळ काढला. आमदारांच्या गाडीवर झालेल्या हल्ल्याच्या निषेधार्थ राष्ट्रवादी काँग्रेसच्या कार्यकर्त्यांनी ठाण्यात ईस्टर्न एक्स्प्रेस महामार्ग रोखून धरला होता. त्याचवेळी पोलिसांनी राष्ट्रवादी काँग्रेस (एसपी) शहर प्रमुख सुहास देसाई यांच्यासह काही कार्यकर्त्यांना ताब्यात घेतले होते.
आव्हाड यांच्या गाडीवर झालेल्या हल्ल्याप्रकरणी पोलिसांनी एफआयआर दाखल केला होता. एफआयआरनुसार, स्वराज संघटनेचे पदाधिकारी अंकुश कदम आणि काही समर्थकांनी आव्हाड यांच्या एसयूव्ही गाडीवर हल्ला करून त्यांना जीवे मारण्याचा प्रयत्न केला. पोलिसांनी सांगितले की, स्वराज संघटनेचे सचिव धनंजय जाधव यांनी या हल्ल्याची जबाबदारी स्वीकारली असल्याने त्याच्यासह अन्य चौघांवरही कारवाई करावी, असे फिर्यादीत म्हटले आहे. “आम्ही कदम, जाधव आणि इतर चौघांविरुद्ध गुन्हा दाखल केला असून घटनेचा तपास सुरू केला आहे,” असे पोलीस अधिकाऱ्याने सांगितले.