.jpeg)
'एचपीझेड टोकन' मोबाइल ॲपशी संबंधित मनी लॉन्ड्रिंग प्रकरणाच्या तपासासंदर्भात तपास यंत्रणेने गुरुवारी अभिनेत्री तमन्ना भाटियाची चौकशी केली. या ॲपमध्ये बिटकॉइन आणि इतर काही क्रिप्टोकरन्सीच्या खाणकामाच्या बहाण्याने अनेक गुंतवणूकदारांना फसवल्याचा आरोप आहे.
अंमलबजावणी संचालनालयाने सांगितले की, येथील प्रादेशिक कार्यालयात प्रिव्हेन्शन ऑफ मनी लाँडरिंग ॲक्ट (पीएमएलए) अंतर्गत अभिनेत्रीचे जबाब नोंदवण्यात आले. सूत्रांनी सांगितले की, भाटिया यांना ॲप कंपनीच्या एका कार्यक्रमात सेलिब्रिटी म्हणून उपस्थित राहण्यासाठी काही पैसे मिळाले होते आणि त्यांच्यावर कोणतेही गुन्हे दाखल नाहीत.
याप्रकरणी तमन्ना भाटियाने सांगितले की, आपल्याला यापूर्वीही समन्स बजावण्यात आले होते, परंतु कामामुळे तिने समन्स पुढे ढकलले आणि गुरुवारी हजर राहण्याचा निर्णय घेतला. मार्चमध्ये या प्रकरणी ईडीने दाखल केलेल्या आरोपपत्रात, एकूण २९९ संस्थांना आरोपी करण्यात आले आहे, ज्यात ७६ चिनी-नियंत्रित संस्था आहेत, त्यापैकी १० संचालक चीनी वंशाचे आहेत, तर दोन संस्था इतर परदेशी नागरिकांच्या नियंत्रणाखाली आहेत.
पोलिसांनी सांगितले की, आरोपींनी गुंतवणूकदारांची फसवणूक करण्यासाठी 'एचपीझेड टोकन' मोबाईल फोन ॲप्लिकेशनचा वापर केला होता. एजन्सीने सांगितले की, गुन्ह्यातील पैसे लाँडरिंग करण्याच्या उद्देशाने अनेक शेल कंपन्यांच्या वतीने डमी संचालकांसह बँक खाती आणि व्यापारी आयडी उघडण्यात आले होते.
बेकायदेशीर ऑनलाइन गेमिंग आणि सट्टेबाजी आणि बिटकॉइन मायनिंगमध्ये गुंतवणुकीसाठी हे पैसे फसवणूक करून मिळवण्यात आल्याचा दावा करण्यात आला होता. ईडीने सांगितले की ५७,००० रुपयांच्या गुंतवणुकीवर तीन महिन्यांसाठी दररोज ४,००० रुपये परत देण्याचे वचन दिले होते, परंतु पैसे फक्त एकदाच दिले गेले आणि त्यानंतर आरोपींनी गुंतवणूकदारांकडून नवीन निधीची मागणी केली. ईडीने सांगितले की, या प्रकरणी देशभरात छापे टाकण्यात आले, त्यानंतर ४५५ कोटी रुपयांच्या स्थावर मालमत्ता आणि ठेवी जप्त करण्यात आल्या.