.jpeg)
विजांच्या कडकडाटासह दोन तास मुसळधार सरी
कोल्हापूर \ शेखर धोंगडे : गेल्या अनेक आठवड्यांपासून उन्हाच्या तीव्र झळा सोसणाऱ्या कोल्हापूरकरांना अखेर पावसाने थोडासा दिलासा दिला. मंगळवारी सायंकाळी शहरात विजांच्या कडकडाटासह जोरदार वाऱ्याचा लपेट घेत मुसळधार पावसाला सुरुवात झाली. सलग दोन तास हा पाऊस कोसळत राहिला.
पावसामुळे शहरातील अनेक भाग अंधारात गेले. विजेच्या झटक्यांमुळे वीजपुरवठा खंडित झाला. काही सखल भागांमध्ये पावसाचे पाणी साचल्याने जनजीवन विस्कळीत झाले आहे. गटारे आणि नाले तुंबल्याचे चित्र दिसून आले.
या अचानक झालेल्या पावसामुळे रस्त्यावरच्या विक्रेत्यांचे मोठे नुकसान झाले. बाजारपेठांतील व्यापाऱ्यांनाही फटका बसला. गेला महिनाभर तापमान ३८ ते ४० अंशांपर्यंत पोहोचत होते, त्यामुळे या पावसाने उन्हापासून त्रस्त नागरिकांना काहीसा दिलासा दिला आहे. राजारामपुरी, बिंदू चौक, शाहूपुरी, टाऊनहॉल परिसर इत्यादी भागांत रस्त्यावर पाणी साचले. काही ठिकाणी वाहतूककोंडी झाली होती.
हवामान विभागाच्या अंदाजानुसार, येत्या २४ ते ४८ तासांत कोल्हापूर जिल्ह्यात हलक्यापासून मध्यम स्वरूपाचा पाऊस पडण्याची शक्यता आहे. ढगाळ वातावरण आणि विजांच्या कडकडाटाची शक्यता वर्तवली आहे.