.jpeg)
मुंब्रा स्थानकाजवळ ८ ते १२ प्रवासी पडले
रेल्वे प्रशासनात खळबळ
मुंबई : मुंबईच्या मध्य रेल्वे मार्गावर आज सकाळी दिवा ते मुंब्रा स्थानकादरम्यान मोठी दुर्घटना घडली. दोन फास्ट लोकल ट्रेन समांतर मार्गावरून जात असताना गाड्यांमध्ये घासाघीस झाली आणि त्यामुळे दारात उभे असलेले ८ ते १२ प्रवासी धावत्या गाडीतून खाली पडले. या हृदयद्रावक अपघातात आतापर्यंत ६ जणांचा मृत्यू झाला असून अनेक प्रवासी गंभीर जखमी झाल्याची माहिती समोर आली आहे.
घटना सकाळी साधारण ९:३० च्या सुमारास घडली. सीएसएमटीहून कासाऱ्याकडे जाणारी फास्ट लोकल आणि कासाऱ्याहून सीएसएमटीकडे येणारी फास्ट लोकल एकमेकांच्या अगदी जवळून जात असताना जोरदार आवाजासह घासाघीस झाली. यादरम्यान खिडकीत किंवा दरवाजावर उभे असलेले प्रवासी थेट रुळावर फेकले गेले. घटनास्थळी एकच गोंधळ उडाला आणि पाहता पाहता पाच जणांचा जागीच मृत्यू झाला.
रेल्वे प्रशासन आणि पोलीस तातडीने घटनास्थळी दाखल झाले असून जखमींना उपचारासाठी कळवा, ठाणे आणि सायन येथील रुग्णालयांमध्ये दाखल करण्यात आले आहे. अपघातानंतर रेल्वे वाहतुकीवर तात्पुरता परिणाम झाला असला तरी काही वेळातच सेवा पूर्ववत करण्यात आली.
रेल्वे प्रशासनाने या दुर्घटनेची गंभीर दखल घेत तातडीने तीन महत्त्वाचे निर्णय जाहीर केले आहेत:
- लोकल ट्रेनच्या दरवाजांवर प्रवाशांना अडवण्यासाठी संरक्षक अडथळे बसवले जाणार.
- सर्व स्थानकांवरील सीसीटीव्ही यंत्रणा अद्ययावत करण्यात येणार.
- प्रत्येक गाडीत ‘स्वयंचलित दरवाजे’ लावण्याचा प्रस्ताव मंजूर.
दरम्यान, दररोजच्या प्रवासात अती गर्दीमुळे प्रवासी दरवाजांवर लटकून प्रवास करतात, ही बाब यामध्ये कारणीभूत असल्याचं प्राथमिक तपासात स्पष्ट झालं आहे. नागरिकांनी रेल्वेच्या नियमांचे पालन करावं आणि स्वतःच्या सुरक्षेची काळजी घ्यावी, असे आवाहन रेल्वे प्रशासनाने केले आहे.
या दुर्दैवी घटनेमुळे संपूर्ण ठाणे परिसरात हळहळ व्यक्त होत आहे. मृतांच्या कुटुंबीयांना शासन आणि रेल्वेच्या वतीने आर्थिक मदतीची घोषणा लवकरच करण्यात येणार असल्याचे सूत्रांकडून सांगण्यात येत आहे.