ठाण्यातील विकासकामांच्या आढाव्याची महत्त्वपूर्ण बैठक
ठाणे : शहरातील विविध विकास कामांच्या प्रगतीचा आढावा घेण्यासाठी परिवहन मंत्री प्रताप सरनाईक यांच्या उपस्थितीत महत्त्वपूर्ण बैठक पार पडली. घोडबंदर मार्गावरील वाढत्या वाहतूककोंडीवर तोडगा काढण्यासाठी सकाळी ६ ते रात्री १२ वाजेपर्यंत अवजड मालवाहतुकीला बंदी घालण्याचा ठराव घेण्यात आला. सदर वाहतूक भिवंडीमार्गे वळविण्यात आल्यास सर्वसामान्य वाहनधारकांना मोठा दिलासा मिळेल, असे मत सरनाईक यांनी व्यक्त केले. या बैठकीत ठाणे महापालिका आयुक्त सौरभ राव व संबंधित अधिकारी उपस्थित होते.
तत्कालीन मुख्यमंत्री व सध्याचे उपमुख्यमंत्री एकनाथ शिंदे यांच्या मार्गदर्शनाखाली ठाणे महानगरपालिकेसाठी तब्बल १८०० कोटी रुपयांचा निधी मंजूर करण्यात आला आहे. या निधीतून राबविण्यात आलेल्या अनेक विकासकामांचा वेग वाढला असून बहुतांश कामांचे लोकार्पण १५ ऑक्टोबरपर्यंत करण्याचे उद्दिष्ट ठेवण्यात आले आहे. अधिकारी व कर्मचाऱ्यांनी प्राधान्याने कामे पूर्ण करावीत, असे निर्देश देण्यात आले. तसेच ३१ डिसेंबरपर्यंत घोडबंदर मार्गावरील सर्व्हिस रोड कार्यान्वित करणे, मधील मोकळ्या जागांचे सिमेंट अस्तरीकरण करून रस्त्याशी जोडणे, याबाबत स्पष्ट आदेश सरनाईक यांनी दिले.
नांगला बंदर खाडी किनाऱ्याचा विकास करताना मोठ्या प्रमाणात वृक्षारोपण करून वनराई क्षेत्र वाढविण्याच्या सूचना करण्यात आल्या. याशिवाय ठाण्यातील अनेक सोसायट्यांमध्ये भटक्या श्वानांचा त्रास वाढल्याने शहराबाहेरील परिसरात श्वान पुनर्वसन केंद्र उभारण्याचा निर्णयही चर्चेत घेण्यात आला.
ठाणे शहरासाठी पर्यावरणपूरक आणि शाश्वत वाहतुकीचा पर्याय म्हणून पॉड टॅक्सी (उन्नत कार) प्रकल्प हाती घेण्यात येणार आहे. लवकरच या प्रकल्पाचे भूमिपूजन करण्याचा मानस असून त्यापूर्वी सुरक्षिततेची मान्यता व आर्थिक व्यवहार्यता तपासून अंतिम स्वरूप देण्यात येईल. बैठकीत या प्रकल्पाचे सादरीकरणही करण्यात आले.
सांस्कृतिक पायाभूत सुविधांचा विकास करण्यावरही भर देण्यात आला. गडकरी रंगायतन व डॉ. काशिनाथ घाणेकर नाट्यगृहानंतर ठाण्यातील घोडबंदर परिसरात तिसरे नाट्यगृह उभारले जाणार असून त्याचे भूमिपूजन उपमुख्यमंत्री शिंदे यांच्या हस्ते होणार आहे. तसेच मोघरपाडा येथील कांदळवन उद्यान, कासारवडवली तलावाचे सुशोभीकरण, जुन्या उद्यानांचे नूतनीकरण, शहरातील विहिरींचे शास्त्रोक्त पुनरुज्जीवन, लता मंगेशकर संगीत विद्यालय उभारणी, शहरातील चौकांचे सुशोभीकरण आदी प्रकल्पांचा आढावा घेण्यात आला.
बैठकीत घेतलेले निर्णय आणि दिलेल्या सूचनांमुळे ठाणे शहराच्या विकास कामांना नवे बळ मिळणार असून नागरिकांना निकट भविष्यात सुकर वाहतूक, सुशोभित पायाभूत सुविधा आणि सांस्कृतिक वैभवाचा अनुभव घेता येणार आहे.
