NHAI मुळे पुणे–बंगळुरू महामार्गावरील वाहतूककोंडीला दिलासा
कोल्हापूर \ शेखर धोंगडे : पुणे–बंगळुरू राष्ट्रीय महामार्ग क्रमांक ४८ वरील नागाव फाटा परिसरात उभारण्यात येत असलेल्या उड्डाणपुलाच्या कामाला सध्या वेग आला आहे. राष्ट्रीय महामार्ग प्राधिकरण (NHAI) व ठेकेदार कंपनीच्या समन्वयातून प्रकल्पाचे काम नियोजनबद्ध पद्धतीने प्रगतीपथावर असून, गेल्या दोन दिवसांपासून महाकाय क्रेन्सच्या साहाय्याने उड्डाणपुलावर गर्डर बसवण्याचे काम सुरू आहे. दुसऱ्या टप्प्यातील आराखड्यानुसार बांधकाम जलद गतीने सुरू असल्याचे चित्र आहे.
नागाव फाटा हा पुणे–बंगळुरू महामार्गावरील अत्यंत महत्त्वाचा व वर्दळीचा जंक्शन असून, या ठिकाणी जड वाहने, ट्रक, कंटेनर तसेच स्थानिक नागरिकांची मोठ्या प्रमाणात ये-जा असते. परिणामी, वारंवार वाहतूक कोंडी व अपघातांच्या घटना घडत होत्या. ही गंभीर बाब लक्षात घेऊन NHAI कडून उड्डाणपुलाचे काम प्राधान्याने हाती घेण्यात आले आहे.
सध्या सुरू असलेल्या वेगवान कामामुळे नागरिकांमध्ये समाधान व्यक्त होत असून, उड्डाणपुल पूर्ण झाल्यानंतर महामार्गावरील वाहतूक अधिक सुरळीत होणार आहे. तसेच स्थानिक नागरिकांना रस्ता ओलांडणे अधिक सुरक्षित व सोयीचे ठरणार आहे. विशेषतः कोल्हापूर विभागातील वाहतुकीचा मोठा ताण कमी होऊन प्रवासाचा वेळ व इंधन खर्चातही बचत होण्याची अपेक्षा व्यक्त केली जात आहे.
दरम्यान, कामकाज सुरू असताना NHAI कडून वाहतूक व्यवस्थापनावर विशेष लक्ष दिले जात असून, वाहनचालकांना शक्य तितका कमी त्रास होईल याची दक्षता घेतली जात आहे. उड्डाणपुल पूर्ण होण्यासाठी अद्याप काही महिने लागण्याची शक्यता असली तरी, सध्याची कामाची गती पाहता प्रकल्प वेळेत पूर्ण होईल, असा विश्वास स्थानिक नागरिक आणि वाहनचालकांमध्ये निर्माण झाला आहे.
नागाव फाटा उड्डाणपुलाचे काम हे केवळ पायाभूत सुविधा विकासापुरते मर्यादित नसून, पुणे–बंगळुरू महामार्गावरील सुरक्षित, वेगवान आणि सुकर वाहतुकीच्या दिशेने टाकलेले एक महत्त्वाचे पाऊल असल्याची भावना नागरिकांकडून व्यक्त होत आहे.