भारतीय खगोलप्रेमींमध्ये उत्सुकता
नवी दिल्ली : खगोलप्रेमींसाठी सूर्यग्रहण ही नेहमीच आकर्षणाची घटना मानली जाते. यंदाचे दुसरे सूर्यग्रहण १२ ऑगस्ट रोजी लागणार असून हे ग्रहण विशेष ठरणार आहे. कारण या ग्रहणादरम्यान आकाशात ‘रिंग ऑफ फायर’ म्हणजेच अग्नीच्या वलयासारखा नजारा पाहायला मिळणार आहे. हे ग्रहण भारतीय वेळेनुसार १२ ऑगस्ट रोजी रात्री ९ वाजून ४ मिनिटांनी सुरू होईल आणि १३ ऑगस्ट रोजी पहाटे ४ वाजून २५ मिनिटांनी समाप्त होईल. ग्रहणाची मुख्य अवस्था तब्बल ६ मिनिटे २३ सेकंद राहणार असल्याने हे दीर्घ कालावधीचे सूर्यग्रहण मानले जात आहे.
आकाशात दिसणारा अद्भुत नजारा पाहण्यासाठी अनेकजण उत्सुक असतात. तर धार्मिक दृष्टिकोनातूनही सूर्यग्रहणाला विशेष महत्त्व आहे. हिंदू धर्मात सूर्यग्रहणाला अशुभ मानले जाते आणि ग्रहणकाळात काही धार्मिक नियमांचे पालन केले जाते.
मात्र, ग्रहणावेळी भारतात रात्र असल्यामुळे हे सूर्यग्रहण भारतातून दिसणार नाही. त्यामुळे भारतात या ग्रहणाचा सूतक काळही मान्य असणार नाही. ज्या ठिकाणी ग्रहण दिसत नाही, त्या ठिकाणी सूतक पाळण्याची आवश्यकता नसते. त्यामुळे १२ ऑगस्ट रोजी श्रावण अमावास्येनिमित्त पूजा, स्नान, दान, तर्पण यांसारखी धार्मिक कार्ये नेहमीप्रमाणे करता येणार आहेत.
या वेळी भारतातील नागरिकांना प्रत्यक्ष ‘रिंग ऑफ फायर’चा नजारा पाहता येणार नसला तरी नासा आपल्या अधिकृत युट्युब चॅनलवरून सूर्यग्रहणाचे थेट प्रक्षेपण करणार आहे. त्यामुळे खगोलप्रेमींना ऑनलाइन माध्यमातून हा दुर्मिळ खगोलीय सोहळा अनुभवता येईल. हे सूर्यग्रहण ग्रीनलँड, आईसलँड, स्पेन तसेच आर्क्टिक क्षेत्रातील काही देशांमधून स्पष्टपणे पाहता येणार आहे.