ईद-ए-मिलाद व गणेशोत्सवाच्या पार्श्वभूमीवर यंत्रणा सज्ज
जळगाव : आगामी ईद-ए-मिलाद आणि गणेशोत्सवाच्या पार्श्वभूमीवर जळगाव शहरात जिल्हा पोलीस दलाच्या वतीने भव्य रूट मार्च काढण्यात आला. जिल्हाधिकारी रोहन घुगे आणि जिल्हा पोलीस अधीक्षक यांच्या संयुक्त नेतृत्वाखाली हा रूट मार्च पार पडला.
रूट मार्चमध्ये अप्पर पोलीस अधीक्षक, पोलीस उपअधीक्षक, शहरातील विविध पोलीस ठाण्यांचे पोलीस निरीक्षक तसेच अधिकारी आणि कर्मचारी मोठ्या संख्येने सहभागी झाले. शहरातील प्रमुख मार्गांवरून पोलिसांनी संचलन करत नागरिकांना कायदा व सुव्यवस्था अबाधित ठेवण्यासाठी पोलीस प्रशासन सज्ज असल्याचा संदेश दिला.
ईद-ए-मिलाद आणि गणेशोत्सव हे दोन्ही सण शांततेत, उत्साहात आणि सामाजिक सलोखा राखत साजरे व्हावेत, यासाठी प्रशासनाकडून विशेष खबरदारी घेतली जात आहे. सणांच्या काळात कोणताही अनुचित प्रकार घडू नये तसेच नागरिकांना सुरक्षित वातावरण मिळावे, यासाठी पोलीस यंत्रणेकडून आवश्यक नियोजन करण्यात आले आहे.
रूट मार्चच्या माध्यमातून नागरिकांमध्ये सुरक्षिततेची भावना निर्माण करण्यासोबतच शांतता, बंधुभाव आणि सामाजिक ऐक्याचा संदेश देण्यात आला. सण साजरे करताना नागरिकांनी प्रशासनाला सहकार्य करावे आणि कायदा-सुव्यवस्था राखण्यासाठी आवश्यक ती काळजी घ्यावी, असे आवाहन करण्यात आले.
दरम्यान, आगामी सणांच्या पार्श्वभूमीवर जळगाव शहरातील संवेदनशील ठिकाणी पोलीस बंदोबस्त वाढविण्यासह वाहतूक नियोजन आणि कायदा-सुव्यवस्थेच्या दृष्टीने विविध उपाययोजना करण्यात येत आहेत. जिल्हा प्रशासन आणि पोलीस दल सण-उत्सव शांततेत पार पाडण्यासाठी पूर्णपणे सज्ज असल्याचे या रूट मार्चमधून स्पष्ट झाले.
