मध्य रेल्वेचा पाच दिवसांचा रात्रकालीन ब्लॉक

मुंबई: कर्जत आणि भिवपुरी रोड या स्थानकांदरम्यान डाऊन मार्गावरील रुळांमधील स्लीपर्सची दुरुस्ती आणि खडीची स्वच्छता करण्याच्या उद्देशाने रात्रकालीन ब्लॉक घोषित केला आहे. बुधवारपासून पाच दिवस हा ब्लॉक होणार असल्याने छत्रपती शिवाजी महाराज टर्मिनसहून सुटणारी शेवटची कर्जत लोकल आणि कर्जत येथून सुटणारी पहिली सीएसएमटी लोकल रद्द करण्यात आली आहे. १९ फेब्रुवारीच्या पहिल्या लोकलपर्यंत हा बदल असेल.

कर्जत आणि भिवपुरी रोड या स्थानकांदरम्यान डाऊन मार्गावरील रुळांमधील स्लीपर्सची दुरुस्ती आणि खडीची स्वच्छता करण्यासाठी बीएसएम मशिनच्या मदतीने काम करण्यात येणार आहे. भिवपुरी रोड ते कर्जत मार्गावर पहिल्यांदाच याचा वापर होणार आहे. यामुळे मध्यरात्री १.५० ते पहाटे ४.५० वाजेपर्यंत पाच दिवस ब्लॉक घेण्यात आला आहे. ब्लॉकच्या कालावधीत सीएसएमटीहून कर्जतसाठी रात्री १२.२४ वाजता सुटणारी शेवटची लोकल आणि कर्जतहून सीएसएमटीसाठी निघणारी मध्यरात्री २.३३ची पहिली लोकल रद्द राहणार आहे, अशी माहिती मध्य रेल्वेने दिली.