भारतीय नौदलाची युद्ध नौका T-80 स्मारक स्वरूपात विराजमान

•  भारतीय नौदलाचा, मराठा नौदलाचा गौरवशाल, प्रेरणादायी इतिहास दुर्गाडी खाडीकिनारी जतन 

डोंबिवली / शंकर जाधव : भारतीय नौदलाचा, मराठा नौदलाचा गौरवशाली आणि प्रेरणादायी इतिहास T-80 या युद्धनौकेच्या स्वरूपात भावी पिढ्यांसाठी दुर्गाडी खाडीकिनारी जतन केला जाईल, असे उद्गार महानगरपालिका आयुक्त डॉ. भाऊसाहेब दांगडे यांनी काढले. भारतीय नौदलाची युद्ध नौका T-80, दुर्गाडी कल्याण येथे स्मारक स्वरूपात विराजमान करण्यासंदर्भात भारतीय नौदल आणि  SKDCL  यांच्यामध्ये नोव्हेंबर महिन्यात सामंजस्य करार झाला होता त्या अनुषंगाने आज मुंबईतील कुलाबा येथील नौसेना डॉक यार्ड मधून T80 ही युद्धनौका नौसेनेमार्फत महापालिका आयुक्त डॉ. भाऊसाहेब दांगडे, माजी महापालिका आयुक्त डॉ.विजय सूर्यवंशी यांच्या उपस्थितीत  महाराष्ट्र नौदलाचे रिअल ऍडमिरल ए एन प्रमोद, कमोडर जिलेट कोशी यांनी SKDCLच्या माध्यमातून महापालिकेकडे सुपूर्द केली. या ऐतिहासिक क्षणी SKDCL चे मुख्य कार्यकारी अधिकारी प्रल्हाद रोडे,शहर अभियंता अर्जुन अहिरे, कार्यकारी अभियंता तरुण जुनेजा उपस्थित होते.

कल्याण डोंबिवली महापालिका आयुक्त म्हणून पदभार स्वीकारल्यापासूनचे  माझे स्वप्न- उद्दिष्ट आज साकार झाले असून कल्याणच्या इतिहासात सकारात्मक परिवर्तन घडवून आणण्यासाठी हातभार लागल्या बाबत  मला सार्थ अभिमान वाटतो अशा शब्दात माजी महापालिका आयुक्त डॉ. विजय सूर्यवंशी यांनी आपल्या भावना यावेळी व्यक्त केल्या.

 T-80 या युद्ध नौकेचे कुलाबा येथून जलमार्गाने कल्याण दुर्गाडी येथे दोन दिवसात आगमन होणार असून किल्ले दुर्गाडी येथे, नदीकिनारी विकास प्रकल्पातील आरमार स्मारकाचा भाग म्हणून  या युद्धनौकेचे जतन केले जाणार आहे. 

माजी महापालिका आयुक्त डॉ. विजय सूर्यवंशी यांच्या संकल्पनेतून साकारलेल्या आणि विद्यमान महापालिका आयुक्त डॉ. भाऊसाहेब दांगडे यांच्या मार्गदर्शनाखाली महानगरपालिकेने केलेल्या पाठपुराव्याअंती कल्याण येथे दाखल होत असलेल्या T-80 या युद्धनौकेमुळे कल्याण मधील पर्यटनाला चालना मिळणार असून पुढील पिढ्यांसाठी प्रथमच या युद्धनौकेच्या स्वरूपात एक प्रेरणादायी स्मारक किल्ले दुर्गाडी येथे उभारले जाणार आहे.