म्हाडातर्फे ४,०८३ सदनिकांची विक्री

 २२ मे पासून नोंदणी व अर्ज स्वीकृतीला प्रारंभ    

१८ जुलै रोजी सोडत  

मुंबई, :  म्हाडाच्या मुंबई गृहनिर्माण व क्षेत्र विकास मंडळातर्फे मुंबईतील विविध गृहप्रकल्पांतर्गत विविध उत्पन्न गटांसाठी ४०८३ सदनिकांच्या विक्रीसाठी सोडत जाहीर करण्यात येणार असून  दि. २२ मे, २०२३ रोजी पासून अर्ज नोंदणी, ऑनलाईन अर्ज भरणा-स्वीकृतीला दुपारी तीन वाजेपासून प्रारंभ होणार आहे. प्राप्त अर्जांची संगणकीय सोडत दि. १८ जुलै, २०२३ रोजी सकाळी ११.०० वाजता वांद्रे पश्चिम येथील रंगशारदा नाट्यगृहात काढण्यात येणार आहे, अशी माहिती मुंबई मंडळाचे मुख्य अधिकारी श्री. मिलिंद बोरीकर यांनी दिली.  

        विक्रीकरिता उपलब्ध असलेल्या सर्व सदनिकांबाबत विस्तृत माहिती म्हाडाचे अधिकृत संकेत स्थळ https://housing.mhada.gov.in तसेच https://www.mhada.gov.in  यांवर प्रसिद्ध करण्यात आली आहे . इच्छुक अर्जदारांनी सहभाग घेण्याकरिता याच संकेत स्थळांचा वापर करावा, असे आवाहन, मिलिंद बोरीकर यांनी केले आहे. संगणकीय सोडतीकरिता वापरण्यात येणारी संगणकीय आज्ञावलीचे नूतनीकरण करण्यात आली  आहे. IHLMS  2.0 (Integrated Housing Lottery Management System) एकात्मिक गृहनिर्माण सोडत व्यवस्थापन प्रणाली ही म्हाडाच्या संगणकीय सोडत प्रणालीचे २.० व्हर्जन आहे.  म्हाडाने आपल्या संगणकीय सोडत प्रणालीमध्ये  अत्याधुनिक तंत्रज्ञानाच्या सहाय्याने महत्वपूर्ण बदल करून २.० व्हर्जन ची निर्मिती करून सोडत संगणकीय आज्ञावली अधिकाधिक पारदर्शक, सोपी, सुलभ आणि सुरक्षित केली आहे. सोडत प्रक्रियेमधे सहभागी होण्याकरिता नोंदणीकरण, कागदपत्र सादरीकरण, पात्रता निश्चिती, ऑनलाइन सोडत वितरण, सदनिकेच्या रकमेचा भरणा अशा सर्व प्रक्रिया मानवी हस्तक्षेपा विरहित १०० टक्के ऑनलाईन पद्धतीने राबविण्यात येणार आहे.  तसेच  ॲण्ड्रोइड मोबाइल फोनवर प्ले स्टोर आणि ॲपल मोबाइल फोनवर APP स्टोर मध्ये  सोडत प्रणालीचे मोबाइल ॲप्लिकेशन MHADA HOUSING LOTTERY SYSTEM  इच्छुक अर्जदारांकरिता उपलब्ध करून देण्यात आले आहे.  

       सोडत प्रक्रियेत सहभाग घेण्याकरिता सर्वप्रथम अर्जदारांनी ऑनलाईन नोंदणी करणे आवश्यक असून नोंदणी केलेल्या पात्र अर्जदारांना अर्ज सादर करण्याकरिता दि. २६ जून, २०२३ रोजी सायंकाळी सहा वाजेपर्यंत मुदत देण्यात आली आहे. अर्जासोबत आवश्यक असलेली उत्पन्न गट निहाय आवश्यक असलेली अनामत रक्कम क्रेडिट कार्ड, डेबिट कार्ड, इंटरनेट बँकिंगद्वारे ऑनलाईन भरण्यासाठी दि. २६ जून, २०२३ रोजी रात्री ११. ५९ वाजेपर्यंत मुदत असणार आहे. तसेच अनामत रकमेचा भरणा बँकेत आरटीजीएस, एनईएफटीद्वारे करण्यासाठी दि. २८ जून, २०२३ रोजी संबंधित बँकेच्या कार्यालयीन वेळेपर्यंत करता येणार आहे. सोडतीसाठी प्राप्त अर्जांची प्रारूप यादी दि. ०४ जुलै, २०२३ रोजी दुपारी तीन वाजता म्हाडाच्या https://housing.mhada.gov.in व https://www.mhada.gov.in या अधिकृत संकेतस्थळांवर प्रसिद्ध केली जाणार आहे. प्रारूप यादी प्रसिद्ध झाल्यापासून ऑनलाइन दावे व हरकती दि. ०७ जुलै, २०२३ दुपारी तीन वाजेपर्यंत दाखल करता येणार आहे. सोडतीसाठी स्वीकृत अर्जांची अंतिम यादी दि. १२ जुलै, २०२३ रोजी दुपारी तीन वाजता म्हाडाच्या अधिकृत संकेतस्थळांवर प्रसिद्ध केली जाणार आहे.  

       मुंबई मंडळाच्या सोडतीत एकूण ४०८३ सदनिकांचा समावेश आहे. यात अत्यल्प उत्पन्न गटासाठी २७९०, अल्प उत्पन्न गटासाठी १०३४, मध्यम उत्पन्न गटासाठी १३९ आणि उच्च उत्पन्न गटासाठी १२० सदनिका आहेत. सोडतीमधील अत्यल्प उत्पन्न गटात पहाडी गोरेगाव पश्चिम येथील प्रधानमंत्री आवास योजनेतील १९४७, अ‍ॅन्टॉप हिलमधील ४१७ तर, विक्रोळीच्या  कन्नमवार नगरमधील ४२४ अशी एकूण २७८८ सदनिका समाविष्ट आहेत.  अल्प उत्पन्न गटात एकूण १०३४ सदनिका असून गोरेगावमधील पहाडी परिसरातील ७३६ सदनिकांचा त्यात समावेश आहे. उर्वरित सदनिका लोकमान्य नगर दादर, अँटॉप हिल वडाळा, सिद्धार्थनगर - गोरेगाव पश्चिम, डीएन नगर -अंधेरी, पंत नगर -घाटकोपर, कन्नमवार नगर विक्रोळी, चारकोप कांदिवली, महावीर नगर कांदिवली,  जुने मागाठाणे बोरिवली, गव्हाणपाडा मुलुंड, पीएमजीपी मानखुर्द, मालवणी मालाड आदी ठिकाणची आहेत. मध्यम उत्पन्न गटासाठी मंडळाने १४० सदनिका उपलब्ध करून दिल्या असून या सदनिका उन्नतनगर गोरेगाव पश्चिम, महावीर नगर कांदिवली, जुहू, अंधेरी पश्चिम, अंधेरी पूर्व, सहकार नगर चेंबुर, लोकमान्य नगर दादर, अँटॉप हिल वडाळा, भायखळा, टिळकनगर चेंबुर, चांदिवली पवई, गायकवाड नगर मालाड, प्रतीक्षा नगर सायन, चारकोप कांदिवली येथे आहेत. उच्च उत्पन्न गटासाठी १२० सदनिकांचा समावेश असून या सदनिका जुहू अंधेरी पश्चिम, वडाळा पश्चिम, ताडदेव, लोअर परळ, शिंपोली कांदिवली, तुंगा पवई, चारकोप कांदिवली, सायन पूर्व येथे आहेत.  

       अत्यल्प उत्पन्न गटाकरिता (EWS) वार्षिक सहा लाख रुपयांपर्यंत उत्पन्न आवश्यक आहे. अल्प उत्पन्न गटाकरिता (LIG) वार्षिक नऊ लाख रुपयापर्यंत उत्पन्न आवश्यक आहे. मध्यम उत्पन्न गटाकरिता (MIG) बारा लाख रुपयांपर्यंत उत्पन्न आवश्यक आहे. उच्च उत्पन्न गटाकरिता (HIG) कमाल उत्पन्न मर्यादा नाही. उपरोक्त चारही उत्पन्न गटासाठी किमान मर्यादा निश्चित करण्यात आलेली नसली तरी अत्यल्प उत्पन्न गटातील व्यक्ती अत्यल्प व अल्प उत्पन्न गटासाठी अर्ज करू शकतात. अल्प उत्पन्न गटातील व्यक्ती अल्प व मध्यम उत्पन्न गटासाठी अर्ज करू शकतात. मध्यम उत्पन्न गटातील व्यक्ती मध्यम व उच्च उत्पन्न गटासाठी अर्ज करू शकतात. उच्च उत्पन्न गटातील व्यक्ती केवळ उच्च उत्पन्न गटासाठीच अर्ज करू शकतात.  

       प्रधानमंत्री आवास योजनेतील सदनिकांची किंमत ही केंद्र व राज्य शासनाचे प्रती सदनिका एकूण अनुदान अडीच लाख रुपये वजा करून निश्चित करण्यात आली आहे. सोडतीत विकास नियंत्रण नियमावली ३३(५) अंतर्गत प्राप्त सदनिका, विकास नियंत्रण नियमावली ३३(५) अंतर्गत बांधकाम चालू असलेल्या सदनिका, मुंबई मंडळांतर्गत विखुरलेल्या सदनिकांचा समावेश आहे. 

      श्री. मिलिंद बोरीकर यांनी नागरिकांना आवाहन केले आहे की, सदनिका विक्री करिता मंडळाकडे निश्चित साचेबद्ध कार्य प्रणाली कार्यरत आहे.  मंडळाने सदनिकांच्या विक्री करिता किंवा तत्सम कोणत्याही कामासाठी कोणालाही प्रतींनिधी/ सल्लागार/ प्रॉपर्टि एजेंट/ मध्यस्थ/ दलाल म्हणून नेमलेले नाही अर्जदारांनी कोणत्याही अनधिकृत व्यक्तीशी परस्पर आर्थिक व्यवहार करू नये आणि तसे केल्यास  मंडळ अथवा म्हाडा प्रशासन जवाबदार राहणार नाही. नागरिकांना असेही आवाहन करण्यात येत आहे की त्यांची अशाप्रकारे कोणी व्यक्ति/ दलाल काही प्रलोभने देऊन फसवणूक करीत असल्याचे आढळल्यास त्यांनी म्हाडाच्या मुख्य दक्षता व  सुरक्षा अधिकारी तसेच उपमुख्य अधिकारी (पणन) मुंबई मंडळ यांचे कार्यालयास कळवावे.     

       अर्जदारांनी सोडतीविषयक सविस्तर माहितीसाठी म्हाडाच्या अधिकृत संकेतस्थळावर प्रसिद्ध करण्यात आलेल्या माहिती पुस्तिकेचे अवलोकन होणे आवश्यक आहे. तसेच अर्ज करतेवेळी अर्जदारांना येणाऱ्या अडचणींसाठी मार्गदर्शनासाठी ०२२-६९४६८१०० या हेल्पलाइन क्रमांकावर संपर्क साधण्याचे आवाहन मुंबई मंडळातर्फे करण्यात आले आहे.   

* एकूण सदनिका ४०८३

* अत्यल्प – २७९० 

* अल्प – १०३४ 

*  मध्यम – १३९ 

*  उच्च – १२०