.jpeg)
मुंबई : आगामी लोकसभा निवडणुकांच्या पार्श्वभूमीवर आणि भारत निवडणूक आयोगाच्या संक्षिप्त पुनरीक्षण कार्यक्रमाअंतर्गत उपक्रम राबविण्यास सुरुवात झाली आहे. त्याचाच एक भाग म्हणून २० जुलैपासून मतदान केंद्रस्तरीय अधिकारी घरोघरी भेटी देऊन मतदारांच्या माहितीची पडताळणी करणार आहेत. संपूर्ण महिनाभराच्या काळात मतदान केंद्रस्तरीय अधिकारी प्रत्येक मतदारांच्या घरी भेटी देणार असल्याचे मुख्य निवडणूक अधिकारी श्रीकांत देशपांडे यांनी सांगितले.
हा उपक्रम म्हणजे आपण आपल्या मताधिकारापासून वंचित राहू नये याची निश्चिती करण्याची नागरिकांसाठीची मोठी संधी आहे, असे देशपांडे यांनी सांगितले. त्यामुळेच हे अधिकारी आपल्या घरी येतील तेव्हा नागरिकांनी आपले स्वतःचे, कुटुंबातील सर्व सदस्यांची नावे मतदार यादीत आहेत की नाहीत हे तपासून घ्यावे, ज्यांनी वयाची १८ वर्ष पूर्ण केली आहेत पण अद्यापही मतदार नोंदणी केलेली नाही, अशांची मतदार नोंदणी करून घ्यावी. मतदार यादीतील आपला वैयक्तिक तपशील, पत्ता यात काही दुरूस्त्या असतील, तर त्यासाठीचे अर्ज भरून द्यावेत. लग्नानंतर नाव बदललेल्या स्त्री मतदारांनी आपली नावे बदलून घ्यावीत, स्थलांतरित झालेल्यांनी नव्या पत्त्याची नोंद करून घ्यावी, असे आवाहन देशपांडे यांनी केले आहे.
या उपक्रमामुळे राज्यातील मतदार याद्यांच्या शुद्धीकरणाचे आणि अद्ययावतीकरणाचे काम सुलभ होणार असल्याचे देशपांडे यांनी सांगितले. तसेच या भेटींमध्ये मतदान केंद्रस्तरीय अधिकारी मतदारांचे वैयक्तिक तपशील, पत्ता आणि छायाचित्रांची पडताळणी केलीजाणारआहे. मृत आणि स्थलांतरित मतदार, दुबार नोंदणी असलेले मतदार, मतदारांचाही शोध घेण्याचे काम देखील करतील. मतदार ओळखपत्रासोबत आधार कार्ड जोडण्याची प्रक्रिया देखील केली जाणार आहे. यासोबतच नव मतदार, तृतीयपंथी आणि भटक्या विमुक्त जाती जमातीतील मतदार, देह व्यवसाय करणाऱ्या महिला मतदारांचा शोध घेऊन त्यांची तसेच मतदार यादीत नाव नसलेल्यांचा शोध घेऊन त्यांची नोंदणी करण्याचे कामही या काळात केले जाणार असल्याचे देशपांडे यांनी सांगितले.
मतदारांच्या सहकार्यामुळेच हा उपक्रम यशस्वी होणार असल्याने, सर्व मतदारांनी त्यांच्या घरी येणाऱ्या मतदान केंद्रस्तरीय अधिकाऱ्यांना सहकार्य करावे आणि विनासंकोच आवश्यक ती माहिती आणि दस्तऐवज द्यावेत, असे आवाहनही देशपांडे यांनी केले आहे.