पश्चिम रेल्वे मार्गावर नो ब्लाॅक
मुंबई : रुळांची दुरुस्ती ओव्हरहेड वायर दुरुस्ती सिंगल यंत्रणेची दुरुस्ती अशा विविध कामांसाठी रविवार २४ डिसेंबर रोजी मध्य व हार्बर रेल्वे मार्गावर मेगा ब्लॉक घेण्यात आला आहे. मेगा ब्लॉकच्या कालावधीत काही लोकल उशीराने धावणार असून काही लोकल रद्द करण्यात आल्या आहेत. तर पश्चिम रेल्वे मार्गावरील ब्लाॅक रद्द करण्यात आल्याचे पश्चिम रेल्वे प्रशासनाकडून सांगण्यात आले.
मध्य रेल्वेच्या माटुंगा-मुलुंड अप आणि डाऊन जलद मार्गावर सकाळी ११.०५ ते दुपारी ३.५५ वाजेपर्यंत दुरुस्तीचे काम सुरू राहणार आहे. या कालावधीत सीएसएमटी स्थानकातून सुटणाऱ्या डाऊन जलद मार्गावरील लोकल माटुंगा आणि मुलुंड स्थानकांदरम्यान धीम्या मार्गावर वळवण्यात आल्या आहेत. तर ठाणे स्थानकातून सुटणाऱ्या अप जलद मार्गावरील लोकल मुलुंड आणि माटुंगा स्थानकांदरम्यान अप धीम्या मार्गावर वळवण्यात आल्या आहेत.
हार्बर मार्गावर पनवेल- वाशी अप आणि डाउन हार्बर मार्गावर सकाळी ११.०५ ते दुपारी ४.०५ वाजेपर्यंत दुरुस्तीचे काम सुरू राहणार आहे. (बेलापूर- खारकोपर आणि नेरुळ - खारकोपर लोकल प्रभावित नाहीत) हार्बर मार्गावर दुरुस्तीच्या कालावधीत पनवेल स्थानकातून सीएसएमटीच्या दिशेने जाणाऱ्या आणि सीएसएमटी स्थानकातून पनवेल बेलापूरला जाणाऱ्या लोकल रद्द करण्यात आल्या आहेत. तर पनवेल स्थानकातून ठाण्याच्या दिशेने जाणारी अप ट्रान्सहार्बर मार्गावरील सेवा आणि पनवेल येथून ठाण्याकडे जाणारी डाउन ट्रान्सहार्बर मार्गावरील लोकल सेवा सकाळी १०.०१ ते दुपारी ३.२० वाजेपर्यंत बंद राहणार आहे.
ब्लॉक कालावधीत छत्रपती शिवाजी महाराज टर्मिनस ते वाशी मार्गावर विशेष लोकल धावणार असून ठाणे ते वाशी/नेरुळ स्थानकांदरम्यान ट्रान्सहार्बर लाईनवर लोकल उपलब्ध करून देण्यात आल्या आहेत. तर बेलापूर/नेरुळ आणि खारकोपर स्थानकांदरम्यान पोर्ट लाईन लोकल उपलब्ध असणार आहेत.