लोणावळ्यात साडेतीन लाखांची एमडी पावडर जप्त

  चार जण जेरबंद; 

एकूण बारा लाखांहून अधिकचा मुद्देमाल हस्तगत 

लोणावळा, (श्रावणी कामत): लोणावळा उपविभागाचे सहा. पोलीस अधीक्षक सत्यसाई कार्तिक यांनी उपविभागाचा पदभार स्वीकरल्यानंतर अवैध धंद्यांवर व गुन्हेगारांवर कायदेशीर कारवाईची मालिका सुरूच ठेवली आहे. गेल्या काही दिवसांपासून लोणावळा विभागात अमली पदार्थांची चोरून विक्री होत असून त्यामुळे परिसरातील तरुणाई नशेच्या आहारी जात असल्याची माहिती श्री कार्तिक यांना मिळाली होती. त्यासाठी सत्यसाई कार्तिक यांनी संकल्प नशामुक्ती अभियान हाती घेऊन त्याअंतर्गत परिसरातील युवकांमध्ये जनजागृती करणे, तसेच अमली पदार्थांचे सेवन, साठवणूक व विक्री करणाऱ्यांवर कठोर कारवाईचा बडगा उगारला आहे. 

संकल्प नशामुक्ती अभियानाचाच एक भाग म्हणून सत्यसाई कार्तिक यांनी मावळ परिसरातील अमलीपदार्थ विकणाऱ्या गुन्हेगारांविरोधात गेल्या काही दिवसात कठोर कारवाया करून अनेक आरोपींना जेरबंद करून त्यांचेकडून मोठ्या प्रमाणावर अमली पदार्थ हस्तगत केले आहेत. दिनांक ०९ जून रोजी सत्यसाई काार्तिक यांनी त्यांच्या पथकासह टाकलेल्या छाप्यात कामशेत पो.स्टे हद्दीतील गगन न्यू लाईफ सोसायटी समोर, रमेश शिंदे यांचे चाळीत इसम नामे 1) दिनेश दीपक शिंदे, (२४) वर्ष, राहणार कामशेत, तालुका मावळ, जिल्हा पुणे व 2) सौरभ राजेश शिनगारे, (२४) वर्ष, राहणार कामशेत, तालुका मावळ जिल्हा पुणे यांना ताब्यात घेऊन पंचांसमक्ष त्यांची झाडाझडती घेतली असता त्या दोघांचे ताब्यातून वेगवेगळ्या वजनाचे एकूण ३२ ग्रॅम एमडी पावडर हा अमलीपदार्थ व त्याची पॅकिंग करून विक्री करण्यासाठी वापरण्यात येणाऱ्या पॅकिंगच्या प्लास्टिकच्या पिशव्या असा एकूण ३,२०,१४६/- रु. किंमतीचा मुद्देमाल जप्त करण्यात आला असून पो कॉ अमोल ननवरे यांनी दिलेल्या फिर्यादीवरून विविध कलमान्वये कामशेत पोलीस स्टेशन येथे गुन्हा नोंद कण्यात आला आहे तसेच पुढील तपास कामशेत पो.स्टे चे पोलीस उपनिरीक्षक शुभम चव्हाण हे करत आहेत. 

तसेच दिनांक १६ जून रोजी कार्तिक यांना मिळालेल्या गुप्त माहितीच्या आधारे सकाळच्या सुमारास इसम नामे 1)शिवाजी मारुती कडू, (३५)  राहणार कुरवंडे, तालुका मावळ, जिल्हा पुणे व 2) दिलीप बबन पिंगळे,२९), राहणार कुनेगाव, तालुका मावळ, जिल्हा पुणे हे त्यांचे ताब्यातील मारुती सुझुकी ब्रेझ्झा गाडीतून लोणावळा दिशेकडे जात असताना लोणावळा पो.स्टे हद्दीतील रायगड ते कुरवडे रोडवर, ड्रीमलँड बंगल्यासमोर कार्तिक यांनी पथकासह त्यांना थांबवून, पंचांसमक्ष त्यांची अंगझडती घेतली असता त्या दोघांचे ताब्यातून वेगवेगळ्या वजनाचे सुमारे ४४०००/- रु. किमतीचे एकूण ०४.४० ग्रॅम एम.डी पावडर मिळून आले आहे. सदरचे एम.डी पावडर हे चारचाकी गाडीतून विक्रीकरिता घेऊन जात असल्याचे नमूद इसमांकडे केलेल्या प्राथमिक चौकशीत स्पष्ट झाल्याने त्यांचेकडून चारचाकी वाहनासह एकूण ८,९४,०००/- रु. किमतीचा मुद्देमाल जप्त करण्यात आला आहे. सदरबाबत पोलीस उपनिरीक्षक शुभम चव्हाण यांनी दिलेल्या फिर्यादीवरून लोणावळा पोलीस ठाण्यात विविध कलमान्वये गुन्हा नोंद करण्यात आला असून पुढील तपास लोणावळा पो.स्टे चे सपोनि लाड हे करत आहेत. 

संकल्प नाशामुक्ती अभियानांतर्गत केलेल्या सदरच्या दोन्ही कारवायांमध्ये सुमारे ३,६०,०००/- रु. किंमतीच्या एकूण ३६.६० ग्रॅम एम.डी पावडरसह १२,१४,१४६ रु./- (अक्षरी - बारा लाख चौदा हजार एकशे सेहचाळीस रुपये) किंमतीचा मुद्देमाल जप्त करण्यात आला असुन दोन्ही गुन्ह्यांमध्ये पोलीस यंत्रणा सखोल तपास करत आहे.

सदरची कारवाई पुणे ग्रामीण पोलीस दलाचे पोलीस अधीक्षक  पंकज देशमुख, अपर पोलीस अधीक्षक  रमेश चोपडे यांचे मार्गदर्शनाखाली लोणावळा उपविभागाचे सहा.पोलीस अधीक्षक सत्यसाई कार्तिक, पोलीस उपनिरीक्षक शुभम चव्हाण, पो.हवा नितेश (बंटी) कवडे, पो.हवा अंकुश नायकुडे, पो.ना दत्ता शिंदे, पो.कॉ गणेश येळवंडे, पो.कॉ सुभाष शिंदे, पो.कॉ अमोल ननवरे, पो.कॉ अंकुश पवार, पो.कॉ गणेश ठाकूर, पो.कॉ प्रतीक काळे , पो.कॉ महेश थोरात, पो.कॉ सौरभ साबळे, पो.कॉ यश माळवे यांचे पथकाने केली आहे.