.jpeg)
अनेक पोलीस जखमी
मुंबई : गुरुवारी मुंबईतील पवई येथील झोपडपट्टी परिसरात बृहन्मुंबई महापालिकेच्या अतिक्रमणविरोधी मोहिमेदरम्यान काही स्थानिकांनी गोंधळ घातला. यावेळी कारवाईसाठी आलेल्या पोलिसांवर आणि बीएमसीच्या अधिकाऱ्यांवर दगडफेक करण्यात आली. या दगडफेकीत अनेक पोलीस जखमी झाले.
दुपारी एकच्या सुमारास घडलेल्या घटनेनंतर बीएमसीने अतिक्रमणविरोधी मोहीम थांबवली, असे एका अधिकाऱ्याने सांगितले. ते म्हणाले की, पवईच्या जय भवानी नगरमध्ये अतिक्रमण काढण्याची कारवाई सुरू असताना स्थानिक लोकांनी पोलिसांवर आणि बीएमसीच्या पथकावर दगडफेक केली. यावेळी दगडफेकीत काही पोलीस जखमी झाले. या दगडफेकीनंतर अतिक्रमणविरोधी मोहीम थांबवण्यात आल्याचे अधिकाऱ्यांनी सांगितले. ज्या ठिकाणी वसाहत आहे त्याठिकाणी ह्युमन राईंट्स कमिशनने नोटीस जारी केली होती. शासकीय वसाहत निर्माण करण्यासाठी ही जागा राखीव आहे. त्यामुळे त्याठिकाणी सध्या असलेली घरे काढण्यासाठी पोलीस गेले होते. नागरिकांनी मात्र त्यांना जोरदार विरोध केला.
दगडफेकीच्या घटनेचा एक व्हिडिओ क्लिप सोशल मीडियावर व्हायरल झाला आहे. यामध्ये महिला आणि पुरुषांचा एक गट पोलीस आणि बीएमसी कर्मचाऱ्यांवर दगडफेक करताना दिसत आहे. दगडफेकीपासून स्वत:ला वाचवण्यासाठी पोलीस पळून जाण्याचा प्रयत्न करत असल्याचेही यावरून दिसून येते.