बेडेकर नगरमधील रहिवाशांचा सहाय्यक आयुक्तांना घेराव
दिवा, (आरती मुळीक परब) : गेल्या काही महिन्यांपासून दिवा पूर्वेतील बेडेकर नगर येथील नागरिक पाण्याच्या समस्येने खूप त्रस्त झाले असून वारंवार लेखी पत्रव्यवहार करूनही महापालिकेचे अधिकारी त्याची दखल घेत नसल्याने त्यांनी मंगळवारी दिवा मनसेच्या प्रभाग ४५ च्या पदाधिकाऱ्यांसोबत दिवा प्रभाग समितीच्या सहाय्यक आयुक्तांना घेराव घातला. त्यावेळी ही समस्या आठ दिवसांत न सुटल्यास दिवा प्रभाग समिती समोर उग्र आंदोलन करण्यात येईल असे, नागरिकांनी आणि मनसे कार्यकर्त्यांनी आयुक्तांना सांगितले.
बेडेकर नगर मधील चाळीतील रहिवाशांना गेल्या ८ ते ९ महिन्यांपासून तीव्र पाणी समस्या आहेत. त्यासाठी तेथील महिला, नागरिक यांचा दिवा प्रभाग समितीतील पाणी अधिकाऱ्यांशी सततचा पाठपुरावा सुरु आहे. पालिका अधिकाऱ्यांना वारंवार लेखी पत्रव्यवहार करूनही ते अधिकारी त्याची दखल घेत नसल्याने आज दिवा मनसेच्या प्रभाग ४५ च्या पदाधिकाऱ्यांनी नागरिकांसोबत दिवा प्रभाग समितीच्या सहाय्यक आयुक्तांना घेराव घातला. त्यावेळी आयुक्तांना पाणी समस्या सोडवण्यासाठी निवेदन दिले. तसेच येत्या ८ दिवसात हा पाणी प्रश्न न सुटल्यास दिवा प्रभाग समिती समोरच उग्र आंदोलन करण्याचा इशारा नागरिकांनी आणि मनसेने दिला आहे.
दिव्यातील बेडेकर नगर हे दिवा स्टेशनपासून ४ ते ५ किलोमीटर एव्हढे लांब आहे. रोज कामाला जाणारे नागरिक दिवा स्टेशन ते बेडेकर नगर चालत येऊन रात्री पाण्यासाठी त्यांना जागाव लागत आहे. या बेडेकर नगरच्या बाजूलाच आगासन फाटकाजवळ दिव्याला पाणीपुरवठा करणारी सर्वात मोठी जलवाहिनी आहे. असे असताना देखिल बेडेकर नगरच्या रहिवाशांना पाण्यासाठी वणवण भटकावे लागत आहेत. त्या रहिवाशांनी शेवटी कंटाळून पालिका अधिकाऱ्यांनी उग्र आंदोलनाचा इशारा दिला आहे.
