कारचालकाचा जागीच मृत्यू तर महिला गंभीर जखमी
अलिबाग (धनंजय कवठेकर) : पेण- पनवेल मार्गावरील कर्नाळा खिंडीत भीषण अपघात झाल्याची घटना रविवार (दि.९) रोजी घडली आहे. या अपघातात कारचालकाचा जागीच मृत्यू झाला आहे, तर कारमध्ये असलेल्या पल्लवी जोशी या गंभीर जखमी झाल्या आहेत. त्यांना उपचारासाठी तत्काळ रुग्णालयात दाखल करण्यात आले आहे.
कारमध्ये असलेल्या पल्लवी जोशी या कारमालक ड्रायव्हर जगदीश हाजरा यांच्यासोबत ठाण्याहून वडखळकडे जात होत्या. कारचालक कर्नाळा खिंडीत आले असता भरधाव वेगात येणाऱ्या कंटेनरने त्यांच्या गाडीला जोरदार धडक दिली, या धडकेत कंटेनर कारवरच पलटी झाला. त्यात कारचा अक्षरशः चक्काचूर झाला असून, चालक जगदीश हाजरा यांचा कंटेनरखाली दबून मृत्यू झाला आहे. तर पल्लवी जोशी या गंभीररित्या जखमी झाल्या असून त्यांना उपचारासाठी तत्काळ रुग्णालयात दाखल करण्यात आले आहे. अपघातानंतर स्थानिक नागरिकांनी तात्काळ धाव घेत जखमींना गाडीबाहेर काढले. हायड्राच्या सहाय्याने गाडीवरील पलटलेला कंटेनर बाजूला काढण्यात आला आहे.