पाळधी : आषाढी एकादशी विशेष पाळधी येथे आयोजित करण्यात आलेल्या पारंपरिक आषाढी दिंडी सोहळ्याला यंदा विशेष स्वरूप प्राप्त झाले. दिंडीत जिल्हाधिकारी आयुष प्रसाद यांनी स्वतः पालखी उचलून सहभाग घेतला. त्यांच्यासोबत राज्याचे पाणीपुरवठा आणि स्वच्छता मंत्री व जळगाव जिल्ह्याचे पालकमंत्री गुलाबराव पाटील यांनीही श्रद्धेने पालखी उचलून सहभाग नोंदवला.
भाविकांच्या घोषणांनी आणि टाळ-मृदंगाच्या गजरात निघालेल्या या दिंडीत जिल्हा प्रशासन आणि स्थानिक लोकप्रतिनिधींनी सहभाग घेतल्यामुळे श्रद्धाळूंमध्ये मोठा उत्साह निर्माण झाला. आषाढी एकादशीच्या निमित्ताने विठ्ठलनामाचा गजर करत हजारो भाविक या दिंडीत सहभागी झाले होते.
जिल्हाधिकारी आयुष प्रसाद यांनी भाविकांमध्ये मिसळून आपली सामाजिक आणि आध्यात्मिक बांधिलकी अधोरेखित केली. यावेळी त्यांनी सांगितले की, "समाजाच्या श्रद्धा आणि संस्कृतीशी जोडलेले हे सोहळे म्हणजे आपली खरी ओळख असून, प्रशासनही या परंपरांमध्ये सहभागी व्हावे हेच खरे समाजाभिमुख शासनाचे लक्षण आहे."
पालकमंत्री गुलाबराव पाटील यांनीही पालखी उचलून वारीतील सहभागाद्वारे सामाजिक ऐक्य आणि श्रद्धेच्या परंपरेला उजाळा दिला. त्यांनी सांगितले, "वारी ही आपल्या सामाजिक समरसतेचं प्रतीक आहे. सगळे भेदभाव विसरून आपण एकत्र येतो हेच या वारीचं यश आहे."
या दिंडीत स्थानिक ग्रामस्थ, महिला मंडळे, कीर्तनकार, वारकरी संप्रदायाचे प्रतिनिधी आणि लहानग्यांपासून ते वयोवृद्धांपर्यंत सर्वच भाविक मोठ्या संख्येने सहभागी झाले होते.
Tags : #AshadhiEkadashi #PalakhiSohla #PaldhiDindi #JalgaonDistrict #AyushPrasadIAS #GulabraoPatil #WarkariSampraday #Vithunama #ShraddhaAndSanskriti #MaharashtraCulture
