चिंचोली येथे ५० खाटांच्या क्रिटिकल केअर युनिट प्रकल्पाचे भूमिपूजन
जळगाव : जिल्ह्यातील नागरिकांना अत्याधुनिक व तातडीच्या आरोग्य सेवा पुरवण्यासाठी महत्त्वपूर्ण ठरणाऱ्या ५० खाटांच्या क्रिटिकल केअर युनिट (अतिदक्षता विभाग) प्रकल्पाचे भूमिपूजन आज चिंचोली (ता. जळगाव) येथील शासकीय वैद्यकीय महाविद्यालय व रुग्णालयाच्या आवारात मोठ्या उत्साहात पार पडले.
या प्रकल्पाचे भूमिपूजन राज्याचे जलसंपदामंत्री गिरीश महाजन व खासदार स्मिता वाघ यांच्या शुभहस्ते करण्यात आले. यावेळी जिल्हाधिकारी आयुष प्रसाद, शासकीय वैद्यकीय महाविद्यालयाचे अधिष्ठाता डॉ. गिरीश ठाकूर, जिल्हा शल्यचिकित्सक डॉ. किरण पाटील यांच्यासह वैद्यकीय व प्रशासकीय अधिकारी उपस्थित होते.
ही युनिट सुरू झाल्यानंतर जिल्ह्यातील गंभीर स्वरूपाच्या रुग्णांना तातडीने उपचार मिळवण्यासाठी पुणे किंवा मुंबई गाठण्याची गरज भासणार नाही. व्हेंटिलेटर, ऑक्सिजन सुविधा, उच्च क्षमतेची ICU बेड्स आणि प्रशिक्षित वैद्यकीय कर्मचारी यांसह सर्व अत्याधुनिक सुविधा या युनिटमध्ये उपलब्ध असतील. ग्रामीण भागातील गरीब आणि मध्यमवर्गीय रुग्णांना यामुळे दिलासा मिळणार आहे.
या प्रकल्पामुळे शासकीय वैद्यकीय महाविद्यालयाचे वैद्यकीय व तांत्रिक क्षमताही वाढणार आहे. भविष्यात वैद्यकीय शिक्षण, संशोधन आणि उपचार पातळीवरही जिल्हा एक महत्त्वाचे केंद्र बनण्याच्या दिशेने वाटचाल करणार आहे.
या उपक्रमामुळे जळगाव जिल्ह्याच्या आरोग्य यंत्रणेत मोठा बदल घडणार असून, शासनाच्या "आरोग्य सर्वासाठी" या धोरणाला बळ मिळणार आहे. कोविडनंतर आरोग्य सेवांबाबत अधिक सजगता वाढली असताना, क्रिटिकल केअर युनिटसारखे प्रकल्प जिल्ह्यातील आरोग्यविषयक गरजा पूर्ण करण्यात महत्त्वाची भूमिका बजावतील, असा विश्वास मान्यवरांनी व्यक्त केला.
आरोग्य सेवेसाठी शासनाकडून होणाऱ्या भरीव प्रयत्नांचा हा एक महत्त्वाचा टप्पा ठरतो आहे. नागरिकांच्या जिवनमूल्यांशी संबंधित अशा यंत्रणांचा विकास ही काळाची गरज असून, यास शासनाने दिलेला प्रतिसाद उल्लेखनीय आहे.
