३८ वी राष्ट्रीय अंडर-११ बुद्धिबळ अजिंक्यपद स्पर्धेचे भव्य उद्घाटन
केंद्रीय युवा व क्रीडा राज्यमंत्री रक्षा खडसे, अशोक जैन आणि खासदार स्मिता वाघ उपस्थित
जळगाव : भारतातील बुद्धिबळ क्षेत्रात भविष्यातील चमकते तारे घडवणाऱ्या ३८ व्या राष्ट्रीय अंडर-११ ओपन आणि गर्ल्स बुद्धिबळ अजिंक्यपद स्पर्धा-२०२५ चे भव्य आयोजन जळगाव येथे करण्यात आले असून, या स्पर्धेचे उद्घाटन जैन हिल्स येथे उत्साहात पार पडले.
या वेळी केंद्रीय युवा व क्रीडा राज्यमंत्री रक्षा खडसे प्रमुख पाहुणे म्हणून उपस्थित होत्या. त्यांच्यासोबत खासदार स्मिता वाघ, जैन इरिगेशनचे अध्यक्ष अशोक जैन, महाराष्ट्र चेस असोसिएशनचे कार्याध्यक्ष सिद्धार्थ मयुर, जळगाव जिल्हा बुद्धिबळ संघटनेचे अध्यक्ष अतुल जैन, तसेच स्पर्धेचे मुख्य ऑर्बिटर देवाशीष बरुआ यांचीही उपस्थिती होती.
उद्घाटन सोहळ्यानंतर रक्षा खडसे यांनी जैन इरिगेशनचे अध्यक्ष अशोक जैन यांची त्यांच्या दालनात भेट घेतली. या भेटीत जिल्ह्याच्या औद्योगिक, शैक्षणिक, क्रीडा आणि पायाभूत विकासावर सविस्तर चर्चा झाली. दोघांनी ग्रामीण भागातील क्रीडासंस्कृती, पाणी व्यवस्थापन, आणि शाश्वत शेती या विषयांवरही सकारात्मक संवाद साधला.
या स्पर्धेत देशभरातून ५५० हून अधिक बाल बुद्धिबळपटूंनी सहभाग नोंदवला असून, "भारताचे उद्याचे बुद्धिबळपटू" अशी या स्पर्धेची ओळख निर्माण झाली आहे. स्पर्धा हे केवळ विजेते ठरवण्याचे नव्हे, तर संघटन, रणनीती, आणि सहनशीलता शिकवण्याचे व्यासपीठ ठरत आहे, असे मत आयोजकांनी व्यक्त केले.
ऑल इंडिया चेस फेडरेशन, महाराष्ट्र चेस असोसिएशन, आणि जळगाव जिल्हा बुद्धिबळ संघटना यांच्या संयुक्त विद्यमाने ही स्पर्धा आयोजित करण्यात आली असून, खेळाडूंसाठी उत्कृष्ट सुविधा, निवास आणि आहाराची सोय करण्यात आली आहे.
स्पर्धा आठवडाभर चालणार असून अंतिम विजेतेपदासाठी स्पर्धकांमध्ये चुरस पाहायला मिळणार आहे. "स्पर्धा, संयम आणि विचारशक्ती" या तिन्हींचे प्रत्यक्ष दर्शन यावेळी झाले आहे.
