ठाणे : ठाणे महापालिकेच्या आगामी निवडणुकांसाठी प्रशासनाने जाहीर केलेल्या प्रारूप प्रभाग रचनेवर नागरिकांनी मोठ्या प्रमाणावर हरकती आणि सूचना नोंदवल्या आहेत. यासाठी ४ सप्टेंबर ही अंतिम मुदत निश्चित करण्यात आली होती. या अखेरच्या दिवशी तब्बल २०० हरकती दाखल झाल्याने एकूण आकडा आता २६१ वर पोहोचला आहे.
पालिका सूत्रांच्या माहितीनुसार, प्रारूप प्रभाग रचना जाहीर केल्यानंतर पहिल्या काही दिवसांत नागरिकांचा प्रतिसाद कमी होता. २ सप्टेंबरपर्यंत केवळ १६ हरकती दाखल झाल्या होत्या. गणेशोत्सवामुळे अनेकजण सणाच्या तयारीत व्यस्त असल्याने सुरुवातीचा ओघ मंदावला होता. मात्र गौरी-गणपती विसर्जनानंतर परिस्थिती बदलली. ३ सप्टेंबर रोजी नागरिकांनी ४४ हरकती नोंदवल्या आणि दुसऱ्याच दिवशी म्हणजे अंतिम मुदतीला तब्बल २०० हरकती दाखल झाल्या. एका दिवसात एवढ्या मोठ्या प्रमाणात आलेल्या हरकतींमुळे प्रशासनालाही अतिरिक्त कामाचा बोजा वाढला आहे.
मागील निवडणुकीत चार सदस्यांचा एक प्रभाग अशी रचना होती. त्यात ३२ प्रभाग चार सदस्यांचे तर एक प्रभाग तीन सदस्यांचा होता. अशा प्रकारे ३३ प्रभागांमधून एकूण १३१ नगरसेवकांची निवड झाली होती. यंदाच्या निवडणुकीत हीच रचना कायम ठेवण्यात आली आहे. त्यामुळे प्रभागांची संख्या व नगरसेवकांची एकूण संख्या बदललेली नाही.
सध्याच्या रचनेनुसार प्रत्येक चार सदस्यांचा प्रभाग सुमारे ५० ते ६२ हजार लोकसंख्येचा आहे, तर तीन सदस्यांचा प्रभाग ३८ हजार लोकसंख्येवर आधारित आहे. प्रभागांचे हे लोकसंख्येचे प्रमाण योग्य आहे का, याबाबत अनेक नागरिकांकडून हरकती नोंदवल्या गेल्याचे समजते.
आता नोंदविलेल्या हरकती आणि सूचना तपासण्यासाठी सुनावण्या घेतल्या जाणार आहेत. नागरिकांच्या आक्षेपांचा सविस्तर आढावा घेऊन, आवश्यक ते बदल विचारात घेत अंतिम प्रभाग रचना निश्चित केली जाणार आहे. त्यामुळे ठाणे महापालिकेच्या निवडणुकीतील पुढील टप्पा नागरिकांच्या सहभागामुळे अधिक महत्त्वाचा ठरणार आहे.
सुरुवातीला मंदावलेला प्रतिसाद अखेरच्या दोन दिवसांत प्रचंड वाढला आणि एकूण २६१ हरकती नोंदवल्या गेल्यामुळे नागरिकांचा जागरूक सहभाग अधोरेखित झाला आहे. त्यामुळे आता प्रशासनासमोर अंतिम आराखडा निश्चित करण्याचे आव्हान उभे राहिले आहे.