जळगाव : यंदाच्या दिवाळीमध्ये परदेशातील आपल्या नातेवाईक आणि मित्रपरिवाराला घरच्या चवीचा दिवाळी फराळ पाठवण्याची सोय आता भारतीय डाक विभागामार्फत उपलब्ध करून देण्यात आली आहे. नागरिकांना २० किलोपर्यंतचा फराळ परदेशात पाठवता येणार आहे.
डाक विभागाच्या माहितीनुसार, कॅनडा, युएई, युके, सिंगापूर, ऑस्ट्रेलिया, रशिया, आयर्लंड यांसह तब्बल १२० देशांमध्ये पार्सल सेवा सुरू करण्यात आली आहे. या सेवेसाठी दर हे पार्सलचे वजन आणि निवडलेल्या वाहतूक सेवेनुसार निश्चित करण्यात आले आहेत.
भुसावळ प्रधान डाक कार्यालयात नागरिकांसाठी विशेष सुविधा उपलब्ध करून देण्यात आल्या असून, पोस्टमन थेट घरी येऊन पार्सल घेऊन जाण्याची सेवा उपलब्ध आहे. त्याचबरोबर नाममात्र दरात पार्सल पॅकिंग सुविधा देखील देण्यात आली आहे. त्यामुळे नागरिकांना पार्सल पाठवताना सर्व सुविधा एकाच ठिकाणी आणि सुलभ पद्धतीने मिळणार आहेत.
या विशेष सुविधेचा लाभ घेण्यासाठी जवळच्या डाक कार्यालयाशी संपर्क साधावा, असे आवाहन भुसावळचे डाक अधीक्षक एम. एस. नवलू यांनी प्रसिद्धीपत्रकाद्वारे केले आहे.