मुख्यमंत्री देवेंद्र फडणवीस यांचे प्रतिपादन
नाशिक : नाशिक जिल्हा परिषदेची नूतन प्रशासकीय इमारत ही राज्यातील सर्वात मोठी आणि सुंदर इमारत आहे. या इमारतीतून सर्वसामान्यांसाठी अतिशय चांगला आणि गतिमान कारभार होईल, असा विश्वास मुख्यमंत्री देवेंद्र फडणवीस यांनी व्यक्त केला.
नाशिक–त्र्यंबकेश्वर रोडवरील एबीबी सर्कलजवळ उभारण्यात आलेल्या या आधुनिक इमारतीच्या उद्घाटन सोहळ्याला उपमुख्यमंत्री एकनाथ शिंदे, जलसंपदामंत्री गिरीश महाजन, शालेय शिक्षण मंत्री दादाजी भुसे, क्रीडा व युवक कल्याण मंत्री ॲड. माणिकराव कोकाटे, तसेच अन्न व औषध प्रशासन मंत्री नरहरी झिरवाळ उपस्थित होते.
मुख्यमंत्री म्हणाले, “राज्यातील सर्व जिल्हा परिषदेच्या इमारतींपैकी नाशिकची इमारत ही सर्वात सुंदर आणि आधुनिक आहे. जिल्ह्यातील लोकप्रतिनिधी, जिल्हा परिषदेचे अधिकारी आणि पदाधिकारी यांचे हे खरोखर कौतुकास्पद कार्य आहे. सुसज्ज सुविधांसह असलेली ही इमारत जनतेसाठी सोयी निर्माण करणारी ठरेल.”
यावेळी मुख्यमंत्री फडणवीस आणि उपमुख्यमंत्री शिंदे यांनी इमारतीची पाहणी केली. उद्घाटनपूर्वी फीत कापून व कोनशिलेचे अनावरण करून उद्घाटन करण्यात आले. कार्यक्रमाच्या सुरुवातीला जिल्हा परिषद मुख्य कार्यकारी अधिकारी ओमकार पवार यांनी मुख्यमंत्री देवेंद्र फडणवीस आणि मान्यवरांचे स्वागत केले. कार्यक्रमाला जिल्ह्यातील विविध लोकप्रतिनिधी, जिल्हा परिषदेचे माजी अध्यक्ष व पदाधिकारी, ग्रामविकास विभागाचे सचिव एकनाथ डवले, विभागीय आयुक्त डॉ. प्रवीण गेडाम, जिल्हाधिकारी आयुष प्रसाद, तसेच मुख्य कार्यकारी अधिकारी ओमकार पवार आदी मान्यवर उपस्थित होते.
नाशिक जिल्हा परिषद नूतन इमारतीची वैशिष्ट्ये
त्र्यंबकेश्वर रोडवरील एबीबी सर्कलजवळ वसलेली ही भव्य प्रशासकीय इमारत प्रगतिशील दृष्टीकोन आणि शाश्वत विकासाचे प्रतिक म्हणून ओळखली जात आहे.
पर्यावरणपूरक व ऊर्जासक्षम बांधकाम
- इमारतीत पुरेसा नैसर्गिक प्रकाश व खेळती हवा.
- छतावर बसविलेली सौरऊर्जा प्रणाली वीज खर्च शून्याच्या जवळ आणेल.
- रेन वॉटर हार्वेस्टिंग प्रणालीमुळे जलसंवर्धनास चालना.
कर्मचाऱ्यांसाठी आधुनिक सोयी
- महिला कर्मचाऱ्यांसाठी स्वतंत्र, सुरक्षित व आरामदायी विश्रांतीगृह.
- अधिकारी व कर्मचाऱ्यांसाठी अध्ययन, संशोधन व संदर्भ सुविधा.
- सभागृहे आणि बैठक व्यवस्था
- बहुउद्देशीय सभागृह व सर्वसाधारण सभा हॉल.
- सहा आधुनिक कॉन्फरन्स हॉल.
- व्हिडिओ कॉन्फरन्सिंग रूमची सुविधा.
इमारतीचा आराखडा व सोयी
- प्रत्येक मजल्यावर ८ ते १२ फूट रुंदीचा पॅसेज.
- ४ लिफ्ट आणि ५ जिन्यांची व्यवस्था.
- पार्किंग, उपहारगृह, मनोरंजन कक्ष, ॲम्फीथिएटरयुक्त प्रांगण.
- सार्वजनिक सुविधा केंद्र, बँक कार्यालये, दिव्यांग कक्ष, अभिलेख कक्ष
- सुरक्षा यंत्रणा आणि प्राथमिक उपचार केंद्र उपलब्ध.
