मुंबई : उल्हासनगर महानगरपालिका निवडणुकीत वंचित बहुजन आघाडीकडून निवडून आलेल्या दोन नगरसेवकांनी शिवसेनेला आपला अधिकृत पाठिंबा जाहीर केला आहे. वंचितकडून निवडून आलेल्या नगरसेविका सुरेखा सोनावणे आणि नगरसेवक विकास खरात यांनी उपमुख्यमंत्री एकनाथ शिंदे यांची मुंबईतील निवासस्थानी भेट घेऊन शिवसेनेला पाठिंब्याचे पत्र सुपूर्द केले.
यावेळी कल्याण–डोंबिवलीचे खासदार डॉ. श्रीकांत शिंदे हे देखील उपस्थित होते. आपल्या प्रभागाच्या सर्वांगीण विकासासाठी तसेच दलित वस्ती सुधार योजनेच्या माध्यमातून प्रभागातील विविध विकासकामे मार्गी लागावीत, या उद्देशाने शिवसेनेला पाठिंबा देत असल्याचे या दोन्ही नगरसेवकांनी उपमुख्यमंत्री एकनाथ शिंदे यांना स्पष्ट केले.
या भेटीदरम्यान आमदार डॉ. बालाजी किणीकर, माजी नगराध्यक्ष सुनील चौधरी, नगरसेवक योगेश जानकर तसेच शिवसेना प्रवक्ते राहुल लोंढे उपस्थित होते. शिवसेना नेतृत्वाने या दोन्ही नगरसेवकांचे आभार मानत त्यांच्या निर्णयाचे स्वागत केले.
उल्हासनगर महापालिकेतील सत्तास्थापनेच्या पार्श्वभूमीवर या पाठिंब्यामुळे शिवसेनेची संख्याबळ वाढले असून, आगामी राजकीय समीकरणांमध्ये महत्त्वाचा बदल घडण्याची शक्यता राजकीय वर्तुळात व्यक्त केली जात आहे.