देशातील चार बलाढ्य कुस्ती संघाचा समावेश
मुंबई :देशातील कुस्तीप्रेमींसाठी एक ऐतिहासिक पर्वणी ठरणारा क्षण मुंबईत अनुभवता येणार आहे. मुंबईत पहिल्यांदाच देशातील चार बलाढ्य कुस्ती राज्यांतील अव्वल पैलवानांचा थरारक महामुकाबला आयोजित करण्यात आला असून, ‘कुस्ती महादंगल २०२६’ या भव्य एकदिवसीय स्पर्धेचे आयोजन दि. २६ जानेवारी रोजी करण्यात आले आहे.
अर्जुन पुरस्कार विजेते व ऑलिम्पियन नरसिंह यादव (पोलीस उपायुक्त, मुंबई) यांच्या संकल्पनेतून आणि नरसिंह फाउंडेशन व नागरिक संरक्षण दल यांच्या संयुक्त विद्यमाने ही स्पर्धा दुपारी २ ते सायंकाळी ७ वाजेपर्यंत, श्री. विलासराव देशमुख मैदान, लोखंडवाला, कांदिवली (पूर्व), मुंबई येथे होणार आहे.
या स्पर्धेत महाराष्ट्र, उत्तर प्रदेश, हरियाणा व पंजाब या चार प्रमुख कुस्ती राज्यांचे संघ सहभागी होणार आहेत. प्रत्येक संघातून ५ पुरुष व २ महिला, असे एकूण ७ खेळाडू आपले कौशल्य सादर करणार असून, विजेत्या खेळाडूंना आकर्षक रोख बक्षिसे देण्यात येणार आहेत.
मराठा वॉरियर्स (महाराष्ट्र) संघात
पृथ्वीराज पाटील (महाराष्ट्र केसरी, वर्ल्ड मेडलिस्ट), रविराज चव्हाण, आदर्श पाटील, सोनबा गोंगाणे, अक्षय ढेरे यांचा समावेश असून, महिला गटात अमृता पुजारी व सोनाली महाडिक लढणार आहेत.
शेर-ए-पंजाब (पंजाब) संघात
करणदीप (पंजाब केसरी), संदीप मान, रोहित प्रजापत, उदय शर्मा, अभिषेक यादव तर महिला गटात प्रियंका सिकरवार व शिवानी सहभागी होणार आहेत.
हरियाणा शूर (हरियाणा) संघात
अंकुश, अमित, निवान, आकाश, सागर तर महिला गटात कुसुम दहिया व मोनी गुर्जर मैदानात उतरतील.
यूपी योद्धा (उत्तर प्रदेश) संघात
अभिनायक सिंह (यूपी केसरी), मुलायम यादव, तेजवीर यादव, आयुष चौधरी, विशाल सहानी तर महिला गटात प्रियंका सिकरवार व फ्रीडम यादव सहभागी होणार आहेत.
या भव्य स्पर्धेसाठी केंद्रीय मंत्री पियुष गोयल, मंत्री गिरीश महाजन, केंद्रीय मंत्री रामदास आठवले, आमदार अतुल भातळखर, आमदार आशिष शेलार, आमदार संजय उपाध्याय हे प्रमुख पाहुणे म्हणून उपस्थित राहणार आहेत. यावेळी हिंदकेसरी, महाराष्ट्र केसरी व जागतिक स्तरावरील कुस्ती विजेत्या खेळाडूंचा विशेष सन्मान करण्यात येणार आहे.
याबाबत बोलताना आयोजक नरसिंह यादव म्हणालेकी,मुंबईत कुस्तीला व्यापक व्यासपीठ मिळावे, यासाठी कुस्ती लीगच्या धर्तीवर या एकदिवसीय स्पर्धेचे आयोजन केले आहे. या माध्यमातून आंतरराष्ट्रीय दर्जाचे खेळाडू घडवण्याचा आमचा संकल्प आहे. भविष्यात देशातील प्रत्येक राज्याचा संघ या स्पर्धेत सहभागी करून घेतला जाईल.
दि. २६ जानेवारी २०२६, दुपारी २ ते सायंकाळी ७, श्री. विलासराव देशमुख मैदान, कांदिवली (पूर्व), मुंबई येथे होणाऱ्या या ऐतिहासिक कुस्ती महादंगलला मोठ्या संख्येने उपस्थित राहण्याचे आवाहन नरसिंह फाउंडेशन व नागरिक संरक्षण दल यांनी केले आहे.
