‘माझं जळगाव, स्वच्छ जळगाव’ उपक्रम नागरिकांचा सहभाग
जळगाव : स्वच्छता ही केवळ प्रशासकीय जबाबदारी नसून ती प्रत्येक नागरिकाची सवय बनली पाहिजे, या प्रेरणेतून जळगाव शहरात स्वच्छतेची व्यापक चळवळ सुरू करण्यात आली आहे. महापौर दीपमाला काळे यांच्या संकल्पनेतून ‘स्वच्छता दूत’ मोहिमेचा शानदार शुभारंभ झाला असून, या उपक्रमामुळे शहरातील प्रत्येक नागरिक स्वच्छतेच्या कामात सक्रियपणे सहभागी होत असल्याचे चित्र दिसत आहे.
शहराला स्वच्छ, सुंदर आणि आदर्श बनवण्यासाठी राबविण्यात येणाऱ्या या मोहिमेचा मुख्य आधार लोकसहभाग हा आहे. महानगरपालिका प्रशासनासोबतच नागरिकांनीही स्वच्छतेची जबाबदारी स्वीकारावी, या उद्देशाने शहरातील प्रत्येक प्रभागात ‘स्वच्छता दूत’ नियुक्त करण्यात आले आहेत. हे दूत नागरिकांमध्ये स्वच्छतेबाबत जनजागृती करतील तसेच स्थानिक पातळीवर स्वच्छता उपक्रमांचे प्रभावी समन्वय साधतील.
देशातील सर्वात स्वच्छ शहर म्हणून ओळखल्या जाणाऱ्या इंदोरच्या धर्तीवर जळगावचा कायापालट करण्याचा मानस महापौरांनी व्यक्त केला आहे. त्यासाठी कचरा व्यवस्थापन अधिक सक्षम करणे, रस्त्यांची नियमित स्वच्छता आणि सार्वजनिक ठिकाणांचे सौंदर्यीकरण यावर विशेष भर देण्यात येत आहे. विशेषतः जळगावचे वैभव मानल्या जाणाऱ्या मेहरूण तलावाच्या स्वच्छतेकडे लक्ष केंद्रित करण्यात आले आहे.
या मोहिमेत स्वच्छतेला केवळ एक उपक्रम न मानता ती नागरिकांच्या दैनंदिन जीवनशैलीचा भाग बनवण्याचा प्रयत्न केला जात आहे. “जळगावला स्वच्छ आणि सुंदर बनवण्याचे स्वप्न तेव्हाच पूर्ण होईल, जेव्हा प्रत्येक जळगावकर या चळवळीत आपला खारीचा वाटा उचलेल,” असे आवाहन महापौर दीपमाला काळे यांनी केले. या उपक्रमामुळे जळगाव शहराच्या स्वच्छतेला नवी दिशा मिळाली असून, लोकसहभागाच्या जोरावर जळगाव आगामी काळात ‘आदर्श शहर’ म्हणून ओळख निर्माण करेल, असा विश्वास व्यक्त केला जात आहे.
