गावदेवी भाजी मंडई पुनर्वसनासाठी महापालिका सज्ज

प्राथमिक नियोजनानुसार १ जूनपर्यंत पुनर्वसन पूर्ण करण्याचे उद्दिष्ट होते. मात्र, प्रत्यक्ष पाहणीनंतर कामाचा आवाका मोठा असल्याचे स्पष्ट झाले असून तांत्रिक कारणांमुळे पुनर्वसनासाठी आणखी काही कालावधी लागणार असल्याचे निदर्शनास आले. सध्या आगीमुळे निर्माण झालेला डेब्रीज हटविण्याचे काम आणि दुरुस्ती व स्थापत्यसंलग्न कामे युद्धपातळीवर सुरू आहेत. महापालिकेची संपूर्ण यंत्रणा साफसफाई व पुनर्बांधणीमध्ये गुंतलेली असून सर्व गाळे सुस्थितीत करून गाळेधारकांना लवकरात लवकर उपलब्ध करून देण्यासाठी प्रयत्न सुरू आहेत.

या पाहणीवेळी सभागृह नेते हणमंत जगदाळे, शिवसेना गटनेते पवन कदम, नगरसेवक राम रेपाळे, संजय वाघुले, सुनेश जोशी, नगरसेविका मृणाल पेंडसे तसेच अतिरिक्त आयुक्त प्रशांत रोडे, उपायुक्त जी. जी. गोदेपुरे, मधुकर बोडके, डॉ. मिताली संचेती, उपनगर अभियंता शुभांगी केसवाणी, सहायक आयुक्त महेशकुमार जामनोर, कार्यकारी अभियंता मोहन कलाल, आपत्ती व्यवस्थापन अधिकारी यासीन तडवी आणि मुख्य अग्निशमन अधिकारी गिरीष झळके यांच्यासह विविध विभागांचे अधिकारी उपस्थित होते.

महापौर शर्मिला रोहित पिंपळोलकर-गायकवाड यांनी भाजी विक्रेत्यांशी संवाद साधत त्यांच्या अडचणी जाणून घेतल्या व प्रशासनाने आवश्यक ती सर्व मदत व मार्गदर्शन करण्याच्या सूचना दिल्या. तसेच गाळेधारकांना लवकरात लवकर दिलासा देण्यासाठी कामे गतीमान करण्याचे निर्देशही दिले.