मुंबई : राज्यातील शाळा सुरू होण्यास अवघा आठवडा शिल्लक असताना शिक्षण विभागाने महत्त्वाचा निर्णय घेतला आहे. त्यानुसार राज्यातील बहुतांश शाळा 15 जूनपासून सुरू होणार असल्या, तरी तीव्र उष्णतेमुळे विदर्भातील शाळांची सुरुवात एक आठवडा पुढे ढकलण्यात आली आहे. विदर्भातील सर्व शाळा आता 22 जूनपासून सुरू होतील.
प्राथमिक शिक्षण संचालक शरद गोसावी आणि माध्यमिक व उच्च माध्यमिक शिक्षण संचालक डॉ. महेश पालकर यांनी संयुक्त परिपत्रकाद्वारे ही माहिती दिली आहे. यासंदर्भातील सूचना विभागीय शिक्षण उपसंचालक, प्राथमिक व माध्यमिक शिक्षणाधिकारी तसेच शिक्षण निरीक्षकांना पाठविण्यात आल्या आहेत.
गेल्या काही आठवड्यांपासून विदर्भात उष्णतेची तीव्र लाट कायम असून तापमानाने विक्रमी पातळी गाठली आहे. उष्माघाताच्या घटनांमध्ये वाढ झाल्याने नागरिकांच्या आरोग्याबाबत चिंता व्यक्त केली जात आहे. चंद्रपूर जिल्ह्यातील ब्रह्मपुरी येथे नुकतेच 47.2 अंश सेल्सिअस इतक्या उच्च तापमानाची नोंद झाली होती. त्यामुळे ब्रह्मपुरी हे देशातील सर्वाधिक उष्ण शहरांपैकी एक ठरले होते.
या पार्श्वभूमीवर भारतीय हवामान विभागाने अकोला, अमरावती आणि वर्धा जिल्ह्यांसाठी 'रेड अलर्ट' जारी केला होता, तर नागपूर आणि यवतमाळ जिल्ह्यांसाठी 'ऑरेंज अलर्ट' घोषित करण्यात आला होता. उष्णतेचा वाढता प्रभाव लक्षात घेऊन विद्यार्थ्यांच्या सुरक्षिततेसाठी शाळा सुरू करण्याची तारीख पुढे ढकलण्याचा निर्णय घेण्यात आल्याचे शिक्षण विभागाने स्पष्ट केले आहे.
दरम्यान, नागरिकांनी दुपारच्या वेळेत अत्यावश्यक कामाशिवाय घराबाहेर पडू नये, पुरेसे पाणी प्यावे आणि उष्णतेपासून बचावासाठी आवश्यक ती काळजी घ्यावी, असे आवाहन प्रशासन आणि हवामान विभागाकडून करण्यात आले आहे.
