मुंबई : भारतातील आघाडीचा ऑडिओ आणि वेअरेबल्स ब्रँड बोट (boAt)ने मुलांच्या लाइफस्टाइल टेक्नॉलॉजी क्षेत्रात प्रवेश करत ‘किड सिरीज’ लॉन्च केली आहे. या नव्या सिरीजमध्ये मुलांच्या सुरक्षिततेसह पालकांशी सातत्यपूर्ण संपर्क ठेवण्यासाठी ‘सेलर नॅव्ह’ स्मार्टवॉच, तसेच सुरक्षित आणि आरामदायी श्रवण अनुभवासाठी ‘सेलर प्ले’ वायरलेस हेडफोन्स सादर करण्यात आले आहेत.
तंत्रज्ञान हे आता मुलांच्या दैनंदिन जीवनाचा महत्त्वाचा भाग बनले असून, ऑनलाइन शिक्षण, मनोरंजन आणि प्रवासादरम्यान डिजिटल उपकरणांचा वापर वाढत आहे. या पार्श्वभूमीवर मुलांच्या वयानुसार सुरक्षित, वापरण्यास सोपी आणि आरामदायी उत्पादने उपलब्ध करून देण्याच्या उद्देशाने बोटने ही नवी श्रेणी बाजारात आणली आहे.
किड सिरीजमधील प्रमुख उत्पादन असलेल्या ‘सेलर नॅव्ह’ स्मार्टवॉचमध्ये रिअल-टाइम लोकेशन ट्रॅकिंग, कम्युनिकेशन आणि विविध सुरक्षा सुविधांचा समावेश आहे. मुलांच्या वाढत्या स्वावलंबनासोबत पालकांना त्यांच्याशी सतत जोडून ठेवण्याच्या उद्देशाने ही स्मार्टवॉच विकसित करण्यात आली आहे.
लाँचप्रसंगी बोटचे मुख्य कार्यकारी अधिकारी गौरव नैय्यर म्हणाले, “तंत्रज्ञान आता बालपणाचा नैसर्गिक भाग बनले असून, त्यामुळे मुले कशी शिकतात, खेळतात आणि एकमेकांशी जोडली जातात, यामध्ये बदल होत आहे. पालकांना मुलांसाठी विशेषतः तयार केलेली, सुरक्षित, आरामदायी आणि अर्थपूर्ण कनेक्टिव्हिटी देणारी उत्पादने हवी आहेत. किड सिरीजच्या माध्यमातून आम्ही मुलांच्या जिज्ञासेला आणि वाढत्या स्वावलंबनाला पाठबळ देतानाच पालकांना अधिक विश्वास आणि मानसिक समाधान देण्याचा प्रयत्न केला आहे.”
६,४९९ रुपये किंमतीच्या ‘सेलर नॅव्ह’ स्मार्टवॉचमध्ये गूगल मॅप्स आधारित रिअल-टाइम लोकेशन ट्रॅकिंग, ५-पॉइंट सॅटेलाइट पोझिशनिंग, जिओ-फेन्सिंग, ४जी टू-वे व्हॉइस आणि व्हिडिओ कॉलिंग, एसओएस फंक्शन तसेच ऑडिओ चॅटसारख्या सुविधा देण्यात आल्या आहेत. या सुविधांमुळे पालकांना मुलांचे लोकेशन जाणून घेणे, त्यांच्याशी दिवसभर संपर्कात राहणे आणि गरज भासल्यास तातडीने प्रतिसाद देणे शक्य होणार आहे.
यासोबत ‘सेलर प्ले’ वायरलेस हेडफोन्सही सादर करण्यात आले आहेत. मुलांसाठी सुरक्षित आणि आरामदायी श्रवण अनुभव देण्याच्या उद्देशाने त्यांची रचना करण्यात आली आहे. १,४९९ रुपये किंमतीच्या या हेडफोन्समध्ये ‘सेफ अँड साउंड लिसनिंग’ तंत्रज्ञानासह ८५ डीबीची कमाल व्हॉल्यूम मर्यादा देण्यात आली आहे.
मऊ आणि आरामदायी इअरकप्स तसेच मुलांसाठी विशेषतः ट्यून केलेले ४० एमएम ड्रायव्हर्स यामध्ये देण्यात आले आहेत. संगीत, गोष्टी आणि शैक्षणिक कंटेंटसाठी दर्जेदार ऑडिओ अनुभव देणाऱ्या या हेडफोन्सची बॅटरी लाइफ तब्बल ६० तासांपर्यंत असल्याचा कंपनीचा दावा आहे. त्यामुळे दैनंदिन शिक्षण, मनोरंजन आणि प्रवासासाठी हे हेडफोन्स उपयुक्त ठरणार आहेत.
पर्सनल ऑडिओ आणि वेअरेबल्स क्षेत्रात आपले स्थान मजबूत केल्यानंतर बोटने चार्जिंग सोल्यूशन्स, होम एंटरटेनमेंट आणि पर्सनल ग्रूमिंगसारख्या विविध श्रेणींमध्ये विस्तार केला आहे. किड सिरीजच्या माध्यमातून कंपनीने आधुनिक भारतीय कुटुंबांच्या बदलत्या गरजांनुसार लाइफस्टाइल टेक्नॉलॉजी क्षेत्रातील आपला विस्तार आणखी पुढे नेला आहे.
किंमत आणि उपलब्धता
बोट सेलर नॅव्ह स्मार्टवॉचची किंमत ६,४९९ रुपये असून ती फेरी पिंक आणि स्काय ब्लू रंगांमध्ये उपलब्ध असेल. तर बोट सेलर प्ले वायरलेस हेडफोन्सची किंमत १,४९९ रुपये असून ते बबलगम पिंक, शार्क ब्लू आणि कोरल ब्लू रंगांमध्ये उपलब्ध असतील. दोन्ही उत्पादने बोटच्या अधिकृत ऑनलाइन चॅनेल्ससह प्रमुख ई-कॉमर्स प्लॅटफॉर्म्सवर उपलब्ध करून देण्यात येणार आहेत.
