रिक्षा-टॅक्सी चालकांसाठी मराठीची मुदत वाढवणार नाही : प्रताप सरनाईक; नियमांचे उल्लंघन करणाऱ्यांवर कारवाईचा इशारा
मुंबई : महाराष्ट्रातील रिक्षा आणि टॅक्सी चालकांसाठी कार्यात्मक मराठीचे ज्ञान अनिवार्य करण्यासाठी देण्यात आलेली १५ ऑगस्टची अंतिम मुदत कोणत्याही परिस्थितीत वाढवली जाणार नाही, असे स्पष्ट मत राज्याचे परिवहन मंत्री प्रताप सरनाईक यांनी बुधवारी व्यक्त केले. सार्वजनिक वाहतूक सेवा देणाऱ्या चालकांना प्रवाशांशी संवाद साधण्यासाठी मराठीचे मूलभूत ज्ञान असणे आवश्यक असल्याचे त्यांनी सांगितले.
महाराष्ट्राची भाषा मराठी असून, राज्यात सार्वजनिक वाहतूक सेवा देणाऱ्या रिक्षा व टॅक्सी चालकांना स्थानिक भाषेचे किमान व्यावहारिक ज्ञान असणे गरजेचे आहे. चालकांना मराठी शिकण्यासाठी सरकारने पुरेसा वेळ दिला आहे. त्यामुळे १५ ऑगस्टपासून रिक्षा आणि टॅक्सी चालकांसाठी कार्यात्मक मराठी अनिवार्य करण्यात येणार असल्याचे सरनाईक यांनी स्पष्ट केले.
दरम्यान, सरकारच्या वतीने आयोजित करण्यात आलेल्या तीन महिन्यांच्या कार्यात्मक मराठी प्रशिक्षणाचा लाभ घेत एक लाखांहून अधिक रिक्षा व टॅक्सी चालकांनी प्रशिक्षण पूर्ण केले आहे, अशी माहितीही सरनाईक यांनी दिली. चालकांनी स्थानिक भाषा शिकण्याचे महत्त्व समजून घेत सरकारच्या उपक्रमाला सहकार्य केल्याचे त्यांनी नमूद केले.
१७ ऑगस्ट रोजी उपमुख्यमंत्री एकनाथ शिंदे यांच्या हस्ते मराठी प्रशिक्षण यशस्वीपणे पूर्ण केलेल्या शेकडो रिक्षाचालकांना प्रमाणपत्रांचे वितरण करण्यात येणार असल्याचेही परिवहन मंत्र्यांनी सांगितले.
"चालकांनी मराठी भाषेत तज्ज्ञ होणे अपेक्षित नाही. प्रवाशांशी दैनंदिन व्यवहार करताना आवश्यक तेवढे कार्यात्मक मराठीचे ज्ञान असणे पुरेसे आहे," असे सरनाईक यांनी स्पष्ट केले. त्यामुळे अंतिम मुदत आणखी वाढवण्याची आवश्यकता नसून, १५ ऑगस्टनंतर नव्या नियमांनुसार आवश्यक ती कारवाई करण्यात येईल, असा इशाराही त्यांनी दिला.
कोकणासाठी एसटीच्या ५,२२० अतिरिक्त बस
दरम्यान, आगामी सणासुदीच्या पार्श्वभूमीवर कोकणात जाणाऱ्या प्रवाशांसाठी महाराष्ट्र राज्य मार्ग परिवहन महामंडळाकडून मोठी तयारी करण्यात येत आहे. सप्टेंबर महिन्यापासून कोकण मार्गावर ५,२२० अतिरिक्त एसटी बस उपलब्ध करून देण्यात येणार असल्याची माहिती सरनाईक यांनी दिली. गणेशोत्सव आणि अन्य सणांच्या काळात कोकणात मोठ्या प्रमाणावर प्रवासी जात असल्याने वाहतूक व्यवस्था सुरळीत ठेवण्यासाठी अतिरिक्त बससेवा देण्यात येणार आहे.