महाराष्ट्राच्या मुलींची सिक्कीमवर मात 

 ४१ वी कुमार मुली (ज्युनिअर) राष्ट्रीय अजिंक्यपद खोखो स्पर्धा

बन्सबेरिया (पश्चिम बंगाल) : पश्चिम बंगालमधील बन्सीबेरी येथील खामरपारा सिशू संघ मैदानावर हे सामने सुरु आहेत. सकाळच्या सत्रात झालेल्या साखळी सामन्यात महाराष्ट्र मुलींच्या संघाने सिक्कीमचा १ डाव १८ गुणांनी (२३-५) असा धुव्वा उडवला. ४१ व्या राष्ट्रीय कुमार-मुली खो-खो स्पर्धेत महाराष्ट्राच्या मुलींच्या संघाने सिक्कीमचा सहज पराभव करत साखळी सामन्यातील पहिला विजय मिळवला.

या सामन्यात दीपाली राठोड (४ मी. संरक्षण व ३ गुण), संपदा मोरे (३.३० मि.संरक्षण व २ गुण ), काजल शेख (३ मि. संरक्षण व ३ गुण ), प्रणाली काळे (२.३० मि. संरक्षण), कल्याणी कंक (१.३० मिनीट संरक्षण व ४ गुण), सोनाली पवार (२ मिनिटे संरक्षण व १ गुण) यांनी शानदार खेळाचे प्रदर्शन केले. पराभूत सिक्कीम संघातर्फे मारिया, मोरेशी यांनी चांगला खेळ केला.

उर्वरित मुलींच्या सामन्यात कर्नाटकने विदर्भचा (१८-११) असा ७ गुणांनी पराभव केला. तसेच आसामने दादरानगर हवेलीचा (२९-२) असा एक डाव २७ गुणांनी, मणिपूरने जम्मू काश्मीरचा (१७-६) असा एक डाव ११ गुणांनी, पोंडिचेरी ने चंदीगड चा (१३-२) असा एक डाव ११ गुणांनी पराभव केला. 

कुमार गटात आसामने बिहारचा (२२-८) असा १ डाव १४ गुणांनी, केरळने दादरा नगर हवेलीचा (२३-६) असा एक डाव १७ गुणांनी,  चंदीगडने त्रिपुराचा (१४-१३) एक गुण ६.२० मिनिटे राखून विजय मिळवला.

दरम्यान, खो-खो फेडरेशनचे सहसचिव डॉ. चंद्रजीत जाधव आणि महाराष्ट्र खो-खो असोसिएशनचे सचिव अ‍ॅड.गोविंद शर्मा यांनी महाराष्ट्र मुली आणि कुमार संघातील खेळाडू आणि प्रशिक्षक यांची भेट घेऊन त्यांना शुभेच्छा दिल्या