दिवा, (आरती मुळीक परब) : छत्रपती शिवाजी महाराज सार्वजनिक शिवज्योत उत्सव, दिवा शहर या मंडळाचा गेल्या वर्षी शिवजयंतीचा वार्षिक अहवाल सादर करण्यात आल्यावर मंडळाच्या लोगोचे शिवभक्तांच्या उपस्थितीत अनावरण करण्यात आले. तसेच सभासदांच्या उपस्थित १९ फेब्रू २०२४ च्या शिवजयंतीचे नियोजन करण्यात आले. मंडळाचे हे ६ वे वर्ष आहे.
शिवराय मनामनात.. शिवजयंती घराघरात.. हा एकच ध्यास समोर ठेवून १९ फेब्रूवारी २०१९ रोजी स्थापना झालेल्या मंडळाचा एकच उद्देश आहे तो म्हणजे शिवरायांचे विचार घराघरात पोहचले पाहिजेत. दिवा शहरातील नगरा नगरात, सोसायटीमध्ये शिवजयंती उत्सव सण म्हणून साजरा झाला पाहिजे.
१९ फेब्रूवारीला शिवजन्मभूमी किल्ले शिवनेरी वरून पायी शीवज्योत घेऊन येऊन दिवा शहरातील अनेक मंडळाना, सोसायटींमध्ये भेट देऊन शिवगर्जना करून भव्यदिव्य अशी नगरप्रदक्षिणा व शोभायात्रेचे दरवर्षी आयोजन करण्यात येते. लो प्राईस मार्ट बेडेकर नगर येथून सकाळी ९.३० वाजता भव्यदिव्य शोभायात्रेला सुरवात करून छत्रपती शिवाजी महाराज चौक, दिवा शीळ स्टेशन रोड, मुंब्रादेवी कॉलनी रोड येथून विठ्ठल मंदिर, दातिवली येथे शिवज्योतीच्या शोभायात्रेची सांगता करण्यात येते. शोभायात्रेमध्ये शिवज्योतीसह, शिवपालखी, ढोलपथक, लेझिमपथक, तुतारी, घोडे व पारंपरिक वेशभूषासह महिला भगिनी, तसेच बालगोपाळ, अनेक सामाजिक संस्था, अनेक शाळा, क्लासेस, स्थानिक भूमिपुत्र, प्रमुख मान्यवरांचा सहभाग असतो. त्यामुळे मंडळाने नियोजन बैठकीत सर्व गोष्टींचा विचार करून सर्वांच्या विचाराने बदल करून येणाऱ्या शिवजयंतीची तयारी केली. त्यावेळी जास्तीजास्त लोकांना आपल्या आपल्या घरात, नगरात आपल्या राजाची शिवजयंती सण म्हणून साजरा करण्याचे व शोभायात्रेत सहभागी होण्याचे मंडळातर्फे आहवान करण्यात आले.
यावर्षी प्रथमच फक्त सन २०२४ या वर्षासाठी कार्यकारी अध्यक्ष म्हणून अशोक भीमराव पाटील यांची निवड केली. तसेच २०२४ च्या नियोजनासाठी अनेकांनी उस्फूर्तपणे सहभाग नोंदवला. तसेच आजच्या अहवाल प्रकाशन, अवधूत हॉल येथे संपन्न झालेल्या नियोजन नियोजन मीटिंगमध्ये आजच्या सभेचे अध्यक्ष म्हणून नारायण पाटील यांची निवड केली होती. त्यांनी आभार व्यक्त करून येणाऱ्या शिवजयंतीला सर्वांनी सहभागी होण्याचे अहवान केले.