अलिबाग , (धनंजय कवठेकर) : महाराष्ट्रातल्या बैलगाडा शर्यतीतील प्रसिद्ध नाव म्हणजे पंढरी शेठ फडके यांचे बुधवारी हृदयविकाराच्या झटक्याने निधन झाले. दुपारी ऑफिसवरून घरी जात असताना त्यांना दीडच्या सुमारास कारमध्येच हृदयविकाराचा झटका आला. पंढरीशेठ यांच्या जाण्याने बैलगाडा शर्यत प्रेमींना मोठा धक्का बसला आहे.
पनवेलच्या विहिघरचे प्रसिद्ध बैलगाडा मालक पंढरी शेठ फडके यांनी महाराष्ट्रातील बैलगाडा शर्यतीला ग्लॅमर मिळवून देण्यात त्यांचा मोलाचा वाटा आहे. बैलगाडा प्रेमी गोल्डमॅन म्हणून ते महाराष्ट्रभर प्रसिद्ध होते. जिथे बैलगाडाशर्यत तिथे पंढरी शेठ फडके हे समीकरण अगदी ठरलेले होते. बैलगाडाशर्यत पुन्हा सुरू व्हावी, म्हणून त्यांनी विशेष प्रयत्न केले होते. जवळपास ४०-५० शर्यतीचे बैल त्यांच्या दावणीला अजूनही आहेत. मुळचे पनवेलचे असणारे पंढरीशेठ फडके हे बैलगाडा शर्यतीचे शौकिन म्हणून प्रसिद्ध झोतात होते. पंढरीनाथ फडके हे आधी शेकाप पक्षात सक्रिय होते. त्यानंतर त्यांनी भारतीय जनता पक्षामध्ये प्रवेश केला. १९८६ सालापासून वडिलांमुळे फडकेंना बैलगाडा शर्यतीची आवड निर्माण झाली होती.
बैलगाडा शर्यतीच्या मैदानात त्यांची हटके एन्ट्री, त्यांना सोन्याची फार आवड होती त्यामुळे सोने आणि गाडीच्या टपावर बसून शर्यत बघण्याच्या आगळ्या वेगळ्या स्टाईलची चांगलीच चर्चा असायची. बैल नजरेत बसला की कितीही पैसे लागू द्या, त्याला विकत घेणारा 'बैल'मालक म्हणून पंढरीशेठ यांची ओळख होती. काही महिन्यांपूर्वी डोंबिवली येथील बैलगाडा मालक राहुल पाटील यांच्यावर गोळीबार केल्याने ते जास्तच चर्चेत आले होते. काही महिने जेलमध्ये घालवल्यानंतर नुकताच ते जामिनावर सुटले होते.