.jpeg)
नवी दिल्ली : महाराष्ट्र पोलीस आणि मिलिटरी इंटेलिजन्सने संयुक्तपणे शुक्रवारी खुल्या बाजारात बनावट भारतीय लष्कराच्या नवीन लढाऊ गणवेशाची निर्मिती आणि विक्री करणाऱ्या दिल्लीस्थित टोळीचा पर्दाफाश केला. याप्रकरणी नाशिकच्या सुरेश खत्रीला (४९) अटक करण्यात आली आहे. या टोळीचा म्होरक्या दिल्ली आणि राजस्थानशी संबंधित असल्याचे प्राथमिक तपासात समोर आले आहे.
दक्षिणी कमांड, मिलिटरी इंटेलिजन्स, पुणे यांनी दिलेल्या माहितीच्या आधारे अहमदनगरमधील जामखेड रोडवर एक व्यक्ती इनोव्हा कारजवळ उभी होती, मात्र त्या व्यक्तीच्या हालचाली संशयास्पद वाटल्याने पथकाने त्याला ताब्यात घेतले. सुरेश प्रीतमदास खत्री असे या व्यक्तीचे नाव आहे. त्याच्यासोबत असलेल्या इनोव्हा कारची झडती घेतली असता लष्कराचे नवीन पॅटर्नचे ४० बनावट लढाऊ गणवेश आढळून आले. या गणवेशाबाबत चौकशी केली असता खत्रीने लष्करातील अधिकाऱ्यांचे नवीन लढाऊ गणवेश विक्रीसाठी आणल्याचे सांगितले. त्याच्याकडे लष्करी गणवेश विक्रीचा परवाना मागितला असता, त्याने आपल्याकडे कोणताही परवाना नसल्याचे सांगितले आणि आरोपींकडून लष्कराचे ४० बनावट नवीन लढाऊ गणवेश सापडले. त्याच्याविरुद्ध भिंगार कॅम्प पोलीस ठाण्यात गुन्हा दाखल करण्यात आला आहे. याप्रकरणी अहमदनगरमधील भिंगार पोलिसांनी शुक्रवारी सुरेश खत्री, आनंद नगर, नाशिक येथे राहणाऱ्या सुरेश खत्रीला अटक केली.
खुल्या बाजारात कॉम्बॅट पॅटर्नच्या गणवेशाच्या अवैध विक्रीचे मोठे रॅकेट सुरू असल्याचेही तपासात उघड झाले आहे. आरोपीने या रॅकेटमध्ये सहभागी असलेल्या दिल्ली आणि राजस्थानमधील काही लोकांची नावेही उघड केली आहेत.
