.jpeg)
बिहार : बिहारमधील समस्तीपूरमध्ये सोमवारी रेल्वेचा मोठा अपघात होता होता टळला आहे. दरभंगाहून नवी दिल्लीला जाणारी बिहार संपर्क क्रांती एक्स्प्रेस ट्रेन दोन भागात विभागली गेली. या अपघातात कोणतीही जीवितहानी झालेली नाही. समस्तीपूर-मुझफ्फरपूर रेल्वे विभागातील खुदीराम बोस पुसा रेल्वे स्थानकाजवळ ही घटना घडली. रेल्वे अधिकाऱ्यांनी घटनास्थळी पोहोचून डबे इंजिनला जोडण्यास सुरुवात केली. या घटनेमुळे रेल्वे वाहतूक विस्कळीत झाली होती मात्र, रेल्वे अधिकाऱ्यांनी लवकरच परिस्थिती पूर्वपदावर आणली.
या अपघातानंतर ट्रेनमधून प्रवास करणाऱ्या प्रवाशांमध्ये गोंधळाचे वातावरण निर्माण झाले होते. लोको पायलटने आपली उपस्थिती दर्शवत ट्रेन थांबवली आणि जवळच्या स्टेशन मास्टरला कळवले. यानंतर तांत्रिक पथकाने घटनास्थळ गाठून रेल्वेचे तुटलेले कपलिंग दुरुस्त करून ट्रेन पुढे रवाना केली.
ट्रेन वेगळी झाल्याची माहिती मिळताच रेल्वेचे अधिकारी घटनास्थळी पोहोचले. यावेळी घटनास्थळी ग्रामस्थांचीही गर्दी झाली. सोनपूर रेल्वे विभागाच्या अधिकाऱ्याने सांगितले की, इंजिन आणि डबे यांना जोडणारे कपलिंग तुटल्याने हा अपघात झाला. कोणतीही जीवितहानी झाल्याचे वृत्त नाही, ट्रेनची दुरुस्ती करून ती दिल्लीला पाठवण्यात आली आहे.
.jpeg)