रत्नागिरी : डिजिटल इंडिया भूमि अभिलेख आधुनिकीकरण कार्यक्रमांतर्गत ग्राम महसूल प्रशासनाला अधिक सक्षम बनवण्यासाठी मोठे पाऊल उचलण्यात आले आहे. जिल्ह्यातील ग्राम महसूल अधिकारी व मंडळ अधिकाऱ्यांना लॅपटॉप व प्रिंटरचे वाटप करण्यात आले. हा उपक्रम राज्याचे उद्योग मंत्री व रत्नागिरी जिल्ह्याचे पालकमंत्री डॉ. उदय सामंत यांच्या हस्ते पार पडला.
या कार्यक्रमाला अप्पर जिल्हाधिकारी भाऊसाहेब गलांडे, निवासी उपजिल्हाधिकारी चंद्रकांत सूर्यवंशी, प्रांताधिकारी जीवन देसाई, माजी नगराध्यक्ष बंड्या साळवी यांच्यासह अनेक मान्यवरांची उपस्थिती लाभली.
डॉ. उदय सामंत यांनी यावेळी सांगितले की, डिजिटल युगात महसूल विभागाची कार्यपद्धती अधिक जलद, पारदर्शक व प्रभावी व्हावी यासाठी आधुनिक साधनसंपत्तीची गरज आहे. या लॅपटॉप आणि प्रिंटरच्या माध्यमातून तलाठी आणि मंडळ अधिकारी ई-फेरफार प्रणालीचा प्रभावी वापर करू शकतील आणि अभिलेखांचे संगणकीकरण अधिक सुलभ होईल.
या उपक्रमामुळे महसूल अभिलेखांची अचूकता, सुरक्षितता आणि वेगवान सेवा पुरवण्याची क्षमता वाढणार आहे. ई-फेरफार प्रणालीच्या वापरामुळे नागरिकांना त्यांच्या मालमत्तेशी संबंधित फेरफार, सातबारा, फेरफार उतारे यासंबंधीची कामे ऑनलाईन स्वरूपात जलद पूर्ण करता येणार आहेत. लॅपटॉप व प्रिंटरच्या वापरामुळे कार्यालयीन प्रक्रियांमध्ये डिजिटल ट्रान्झिशनला चालना मिळेल. तलाठी आणि मंडळ अधिकाऱ्यांची कार्यक्षमता व नागरिक सेवा सुधारेल.
हा उपक्रम रत्नागिरी जिल्ह्यातील प्रशासनाला ‘डिजिटल इंडिया’ मोहिमेच्या दिशेने अधिक सक्षम व तत्पर बनवणारा महत्त्वपूर्ण टप्पा ठरणार आहे.
