रहिवाशांना आधीच बाहेर काढल्याने मोठी जीवितहानी टळली
मुंबई: भायखळा पश्चिमेकडील मदनपुरा परिसरात सोमवारी पहाटे एक चार मजली जीर्ण इमारत पत्त्याच्या बंगल्याप्रमाणे कोसळली. सुदैवाने, ही इमारत धोकादायक म्हणून घोषित करून दोन दिवसांपूर्वीच रिकामी करण्यात आल्याने या दुर्घटनेत कोणतीही जीवितहानी झाली नाही. या घटनेमुळे मुंबईतील धोकादायक इमारतींचा प्रश्न पुन्हा एकदा ऐरणीवर आला आहे.
भायखळा येथील मदनपुरा पोस्ट ऑफिसजवळ असलेली ही म्हाडाची इमारत अत्यंत जुनी आणि धोकादायक बनली होती. प्रशासनाने ही बाब गांभीर्याने घेत रहिवाशांना इमारत रिकामी करण्याची नोटीस बजावली होती. त्यानुसार, २ ऑगस्ट रोजीच इमारतीमधील सर्व कुटुंबांना सुरक्षित ठिकाणी हलवण्यात आले होते.
सोमवारी पहाटे २ वाजण्याच्या सुमारास इमारतीच्या तिसऱ्या आणि पहिल्या मजल्याचा काही भाग कोसळला. त्यानंतर काही वेळातच संपूर्ण इमारत जमीनदोस्त झाली. इमारत रिकामी असल्याने मोठी दुर्घटना टळली.
घटनेची माहिती मिळताच अग्निशमन दलाचे जवान, मुंबई पोलीस, महापालिका कर्मचारी आणि म्हाडाचे अधिकारी तातडीने घटनास्थळी दाखल झाले. इमारतीच्या ढिगाऱ्याखाली कोणीही अडकले नाही, याची खात्री करण्यासाठी बचावकार्य सुरू करण्यात आले. खबरदारीचा उपाय म्हणून परिसरातील वाहतूक थांबवण्यात आली होती आणि जवळच्या काही धोकादायक घरांनाही रिकामे करण्याच्या सूचना देण्यात आल्या आहेत.
प्रशासनाने वेळीच योग्य ती कारवाई केल्याने रहिवाशांचे प्राण वाचले. या घटनेने मुंबईतील इतर धोकादायक इमारतींमध्ये राहणाऱ्या नागरिकांच्या सुरक्षेचा आणि पुनर्वसनाचा मुद्दा पुन्हा एकदा चर्चेत आला आहे.
